விராட் கர்ணா, நபா நடேஷ், ஐஸ்வர்யா மேனன், மகேஷ் மஞ்ச்ரேகர் உள்பட பலர் நடித்துள்ள திரைப்படம், ‘நாகபந்தம்’.
அபிஷேக் நாமா எழுதி இயக்கியுள்ள இப்படம், ஜூலை 3ம் தேதி தமிழ், தெலுங்கு, இந்தி, கன்னடம், மலையாள மொழிகளில் வெளியாகிறது. இந்தப் படத்தின் செய்தியாளர்கள் சந்திப்பு சென்னையில் நடைபெற்றது. படக்குழுவினர் கலந்து கொண்டனர்.
நடிகை நபா நடேஷ் பேசும்போது, "இது சாதாரணமான திரைப்படம் அல்ல. நமது வரலாறு, மர்மம், சாகசம், ஆக் ஷன், த்ரில்லர் மற்றும் உணர்வுப்பூர்வமான தருணங்கள் அனைத்தும் இணைந்த பிரம்மாண்டமான திரை அனுபவம். இதில் பணியாற்றியது சிறப்பான அனுபவமாக இருந்தது. படத்தின் கதையும், உருவாக்கப்பட்ட உலகமும் பார்வையாளர்களுக்கு புதுமையான அனுபவத்தை வழங்கும். டிரெய்லருக்கு கிடைத்துள்ள வரவேற்பு மகிழ்ச்சியை தந்திருக்கிறது” என்றார்.
நாயகன் விராட் கர்ணா பேசும்போது, “இந்தப் படம் இந்திய கலாச்சாரம், பாரம்பரியம், தைரியம், கோயில்களின் மரபு, நமது தொன்மையான நாகரீகத்தின் பல அம்சங்களை பேசுகிறது. நம் நாட்டின் வரலாறு மற்றும் ஆன்மிக மரபுகளை புதிய தலைமுறைக்கு கொண்டு செல்லும் முயற்சியாக இந்தப் படம் இருக்கும்” என்றார்.
