நடிகை சமந்தா, தனது தயாரிப்பு நிறுவனமான ட்ராலாலா மூவிங் பிக்சர்ஸ் சார்பில் தயாரித்து நடிக்கும் படம், ‘மா இண்டி பங்காரம்’. இதை நந்தினி ரெட்டி இயக்குகிறார். ‘ஓ! பேபி’ படத்துக்குப் பிறகு இருவரும் இதில் இணைந்துள்ளனர்.
சமந்தாவுடன் குல்ஷன் தேவய்யா, திகாந்த், கவுதமி, மஞ்சுஷா முக்கிய வேடங்களில் நடிக்கின்றனர். இதன் படப்பிடிப்பு அக்டோபர் மாதம் தொடங்கியது. இதற்கிடையே சமந்தா, ‘த பேமிலிமேன்’ வெப் தொடரின் இயக்குநர்களில் ஒருவரான ராஜுவைக் காதலித்து இரண்டாவது திருமணம் செய்து கொண்டார்.
இதற்காகப் படப்பிடிப்பில் இருந்து விலகி இருந்த அவர், இப்போது மீண்டும் படப்பிடிப்பில் இணைந்துள்ளார். இந்தப் படத்தில் ஆக்ஷன் காட்சிகளிலும் சமந்தா நடிக்கிறார். இதற்காக ஒப்பந்தம் செய்யப்பட்டுள்ள ஹாலிவுட் ஸ்டன்ட் இயக்குநர் லீ விட்டேகர், ஹைதராபாத் வந்துள்ளார்.
“லீ விட்டேகர் ஒரு மாதத்துக்கு மட்டுமே இங்கு வந்துள்ளார். அதற்குள் அவருடனான எங்கள் வேலைகளை ஒரே மூச்சில் முடிக்க இருக்கிறோம். ஹைதராபாத்தில் இப்போது மிகவும் குளிராக இருக்கிறது. என்னைச் சுறுசுறுப்பாக வைத்திருக்க இரு மடங்கு கடினமாக உழைக்க வேண்டியிருக்கிறது” என்று சமந்தா தெரிவித்துள்ளார்.
லீ விட்டேகர், இதற்கு முன்பு கமல்ஹாசனின் ‘விஸ்வரூபம்’ ரஜினிகாந்தின் ‘லிங்கா’, ராஜமவுலியின் ‘பாகுபலி 2’ உள்பட சில படங்களில் சண்டைக் காட்சிகளை அமைத்துள்ளார்.
