அமராவதி: ஆந்திர துணை முதல்வர் பவன் கல்யாண் தனது 3-வது மனைவியான ரஷ்ய நாட்டைச் சேர்ந்த அன்னா லெஷ்னேவாவை பிரிந்தார். இவர்களது 13 ஆண்டு திருமண பந்தம் முடிவுக்கு வந்ததாக இருவரும் கூட்டாக அறிவித்துள்ளனர்.
நடிகர் சிரஞ்சீவியின் சகோதரரும் நடிகருமான பவன் கல்யாண் கடந்த 1997-ல் நந்தினி என்பவரை திருமணம் செய்தார். 2008-ல் இருவரும் பிரிந்தனர். அடுத்்து தன்னுடன் தெலுங்கு திரைப்படத்தில் நடித்த நடிகை ரேணு தேசாயை, 2009-ல் திருமணம் செய்தார். இருவரும் 2012-ல் விவாகரத்து பெற்றனர். 2013-ல் ரஷ்ய நாட்டைச் சேர்ந்த அன்னா லெஷ்னேவாவை பவன் கல்யாண் திருமணம் செய்தார். கடந்த 2024-ல் பவன் கல்யாண் ஆந்திர துணை முல்வரானார்.
இந்நிலையில், இவர்களின் 13 ஆண்டு கால திருமண பந்தம் முடிவுக்கு வந்துள்ளது. இவர்கள் இருவரும் மனமொத்து பிரிவதாக அறிவித்துள்ளனர். இருவரும் கூட்டாக வெளியிட்டுள்ள அறிவிப்பில்,‘‘எங்கள் வாழ்க்கையின் ஒரு முக்கிய பகுதியை ஒன்றாகக் கழித்த பிறகு, பரஸ்பர புரிதலுடனும் மரியாதையுடனும் பிரிந்து செல்ல நாங்கள் முடிவு செய்துள்ளோம்.
நாங்கள் தொடர்ந்து நல்ல நண்பர்களாகவும், எங்கள் பிள்ளைகளுக்குப் பொறுப்பான பெற்றோர்களாகவும் இருப்போம்,’’ என்று கூறியுள்ளனர். இந்த தம்பதியினருக்கு ஒரு மகள் மற்றும் மகன் உள்ளனர் என்பது குறிப்பிடத்தக்கது.
