பிரபல இந்தி நடிகை ரவீணா டாண்டன், 90-களில் அர்ஜுனுடன் ‘சாது’, கமலுடன் ‘ஆளவந்தான்’ படங்களில் நடித்திருக்கிறார். ‘கே.ஜி.எஃப் 2’ படத்திலும் நடித்துள்ள இவருக்கு ராஷா தடானி, ரன்பிர் வர்தன் என மகள், மகன் உள்ளனர். இவர் பூஜா, சாயா ஆகிய பெண் குழந்தைகளையும் தத்தெடுத்து வளர்த்து வருகிறார்.
ரவீணாவின் மகள் ராஷா, ‘ஆசாத்’ என்ற இந்திப் படத்தில் அறிமுகமானார். இந்தப் படம் வெற்றி பெறவில்லை என்றாலும், ராஷா இடம்பெற்ற பாடல் ஹிட்டானது. இணையத்திலும் வைரலானது. இப்போது ராஷா, தெலுங்கில் நாயகியாக அறிமுகமாகிறார்.
பிரபல தெலுங்கு ஹீரோ மகேஷ்பாபுவின் சகோதரர் ரமேஷ் பாபுவின் மகன் ஜெய கிருஷ்ணா ஹீரோவாக அறிமுகமாகிறார். இந்தப் படத்தை அஜய் பூபதி இயக்குகிறார். இவர் தெலுங்கில் வெற்றி பெற்ற ‘ஆர்எக்ஸ் 100’, ‘மங்களவாரம்’ ஆகிய படங்களை இயக்கியவர்.
இளமையான காதல் கதையை கொண்ட இந்தப் படத்தில் ஜெய கிருஷ்ணா ஜோடியாக, ராஷா அறிமுகமாக இருக்கிறார். இது தொடர்பான அதிகாரப்பூர்வ அறிவிப்பு விரைவில் வெளியாக இருக்கிறது.