நடிகர் டேனியல் கிரேக்
அடுத்த ஜேம்ஸ் பாண்ட் நடிகருக்கான தேடல் தொடங்கிவிட்டதாக அமேசான் எம்.ஜி.எம் ஸ்டூடியோஸ் அறிவித்துள்ளது.
பிரபல நடிகர் டேனியல் கிரேக் தொடர்ந்து 5 ஜேம்ஸ்பாண்ட் படங்களில் நடித்துள்ளார். பாண்ட் பட வரிசையின் 25-வது படமான ‘நோ டைம் டு டை’, கடந்த 2021-ம் ஆண்டு டேனியல் கிரேக்கின் கடைசி பாண்ட் படமாக வெளியானது. இனி, பாண்ட் கேரக்டரில் நடிக்கப் போவதில்லை என்று அவர் அறிவித்துவிட்டார்.
இதனால் அடுத்த ஜேம்ஸ் பாண்ட் யார் என்ற கேள்வி ரசிகர்களிடம் எழுந்துள்ளது. நடிகர்கள் இட்ரிஸ் எல்பா, டாம் ஹாலண்ட், ஆரோன் டெய்லர்- ஜான்சன், ஜேக்கப் எலார், காலம்டர்னர் ஆகியோரில் ஒருவர் பாண்ட் கதாபாத்திரத்தில் நடிக்கலாம் என செய்திகள் வெளியாயின. ஆனால், இதுவரை அது உறுதி செய்யப்படவில்லை.
அடுத்த ஜேம்ஸ் பாண்ட் திரைப் படத்தை ‘டூன்’ வரிசைப் படங்களை இயக்கிய டெனிஸ் வில்லெனுவ் இயக்க இருக்கிறார். இதற்கிடையே ஜேம்ஸ் பாண்ட் கதாபாத்திரத்துக்கான தேர்வுகள் அதிகாரப் பூர்வமாகத் தொடங்கியுள்ளன. இதற்காக ‘கேம் ஆஃப் த்ரோன்ஸ்’ தொடரின் காஸ்டிங் இயக்குநர் நினா கோல்டை, அமேசான் எம்.ஜி.எம் ஸ்டூடியோஸ் நியமித்துள்ளது. “அடுத்த ஜேம்ஸ் பாண்டுக்கான தேடல் தொடங்கி விட்டது. சரியான நேரம் வரும்போது 007 ரசிகர்களுடன் கூடுதல் செய்திகளைப் பகிர்ந்து கொள்ள உள்ளோம்” என்று அந்நிறுவனம் தெரிவித்துள்ளது.
