துல்லியமாகத் திட்டமிட்டு நிறைவேற்றப்பட்ட பெரும் கொள்ளை, தற்செயல் நிகழ்வால் சிதறிப் போவதே ‘த கில்லிங்’ (THE KILLING -1956) திரைப்படத்தின் ஒருவரிக் கதை. பரபரப்பான குதிரைப் பந்தயத்துடன் தொடங்குகிறது, படம். செப்டம்பர் கடைசி சனிக்கிழமை மாலை 3:45 மணிக்கு ‘மார்வின் உங்கர்’ என்ற முதியவர் குதிரைகளின்மேல் பணம் கட்டுகிறார்.
அங்கிருந்து கதை ஒரு மணி நேரம் பின்னோக்கிச் செல்வதாக அரூபக் குரல் அறிவிக்கிறது. ஊழல் போலீஸ் அதிகாரி ராண்டி கென்னன், கடனை நெருக்கும் லியோ என்பவரிடம் அவகாசம் கேட்க, 2600 டாலர் கடன், வட்டியுடன் சேர்ந்து 3000 டாலராக மாறுகிறது.
கொள்ளைத் திட்டத்தின் ‘மூளை’யான ஜானி கிளே சிறையிலிருந்து வந்ததும், தனது காதலி ஃபே-விடம் ஒரு பெரிய திட்டத்தைக் கூறி, ‘அடுத்த வாரம் அமெரிக்காவில் இருப்போம்’ என்று நம்பிக்கைக் கொடுக்கிறான்.
கதை 6:30 மணிக்கு மாறுகிறது. மைதான பார் டெண்டரான மைக் தனது நோயாளி மனைவி ரூத்தியிடம் ‘விரைவில் பணம் வரும்’ என்று ஆறுதல் சொல்கிறான். அதே இரவு 7:15 மணிக்கு, காசாளர் ஜார்ஜ் பீட்டி தனது மனைவி ஷெர்ரியிடம் ‘பெரும் பணம் வரப் போகிறது’ என்று உளற, ஷெர்ரி அதைத் தனது கள்ளக்காதலன் வாலுடன் பகிர்ந்து கொள்கிறாள்.
ஜானி கிளே தனது குழுவினரை (ராண்டி, மைக், ஜார்ஜ்) மார்வின் உங்கரின் குடியிருப்பில் சந்திக்கிறான். 2 மில்லியன் டாலர் கொள்ளைத் திட்டத்தை வரைபடமாக விளக்குகிறான்.
ஷெர்ரி ஒட்டுக் கேட்பது கண்டுபிடிக்கப்பட்டு எச்சரிக்கப்படுகிறாள். திட்டத்தில் மல்யுத்த வீரர் மாரிஸை, 2500 டாலருக்கும், துப்பாக்கி வீரன் நிக்கி-யை 5000 டாலருக்கும் ஒப்பந்தம் செய்கிறான் ஜானி.
குறிப்பிட்ட நாளில் மாரிஸ், பாரில் ஒரு சண்டையை உருவாக்கி போலீஸை திசைத் திருப்ப, நிக்கி கார் பார்க்கிங்கிலிருந்து ஓடும் குதிரையைச் (ரெட் லைட்னிங்) சுடுகிறான். மைதானமே கலவரமாகிறது.
ஜானி கிளே முகமூடி அணிந்து, ஜார்ஜ் திறந்து வைத்த கதவு வழியாகப் பண அறைக்குள் நுழைந்து 2 மில்லியன் டாலர்களை நிரப்புகிறான். ஜன்னல் வழியாக வீசப்பட்ட பையை ராண்டி தனது காரில் எடுத்துச் செல்கிறான். செஸ் விளையாட்டின் துல்லியத்தில் திட்டம் நிறைவேறுகிறது.
திட்டப்படி, தன் அறையில் ராண்டி வைத்த பணத்தை எடுத்துக் கொண்டு இரவு 7 மணிக்கு ஜானி வரவேண்டும். வரவில்லை; பங்கு பிரிக்கக் காத்திருக்கும் குழுவினரிடையே பதற்றம்.
7:15 மணிக்குக் கதவு தட்டப்பட, வந்தது யார்? கொள்ளையடிக்கப்பட்ட பணம் முறையாகப் பகிரப்பட்டதா? சூழ்நிலையால் கொள்ளையர்களாக மாறிய அந்த சாதாரண மனிதர்களின் கதி என்ன? என்பதை வித்தியாசமான கதை சொல்லல் பாணியுடன், விறுவிறுப்பாக விவரிப்பதே ‘தி கில்லிங்’.
ஜேம்ஸ் பி.ஹாரிஸ் 1956-ல் தயாரித்த இப்படத்தை லயோனல் ஒயிட் எழுதிய கிளீன் பிரேக் (Clean Break) நாவலைத் தழுவி, ஜிம் தாம்சனின் கூர்மையான வசனங்களுடன் திரைக்கதை எழுதி இயக்கியவர் ஸ்டான்லி குப்ரிக்.
தனது 49 ஆண்டுகால திரைப்பயணத்தில் வெறும் 13 படங்கள் மற்றும் 3 ஆவணப் படங்களை மட்டுமே அவர் படைத்திருக்கிறார். ‘கற்பனை செய்ய முடிந்தால், அதைத் திரையில் கொண்டு வரவும் முடியும்’ என்ற சித்தாந்தத்துக்கு ஏற்ப, வரலாறு, அறிவியல் புனைவு, போர், அரசியல் நையாண்டி என அனைத்துத் தளங்களிலும் ஆகச்சிறந்த மைல்கல் படங்களை குப்ரிக் உருவாக்கியுள்ளார்.
இப்படத்தில் வரும் குற்றவாளிகள் இயல்பில் கெட்டவர்கள் அல்ல; தவறான முடிவுகளால் சிக்கியவர்கள் என்ற உளவியலைச் சொல்லியிருக்கிறார் குப்ரிக். ஜானி கிளே (ஸ்டெர்லிங் ஹெய்டன்) தனது சிறை அனுபவத்துக்குப் பிறகு காதலி ஃபே-வுடன் (கோலீன் கிரே) நிம்மதியாக வாழவும், காசாளர் ஜார்ஜ் (எலிஷா குக்) தன்னை அவமதிக்கும் மனைவியின் அன்பைப் பெறவும், ரோந்து போலீஸ் ராண்டி (டெட் டி கோர்சியா) தனது கடனை அடைக்கவும் குற்றச் செயல் புரிகிறார்கள்.
நச்சும் கவர்ச்சியும் கலந்த ‘ஃபெம் ஃபேடல்’ கதாபாத்திரமான ஷெர்ரி (மேரி விண்ட்சர்), படத்தின் திருப்புமுனை. கணவன் ஜார்ஜுக்குத் செய்யும் அவரின் பேராசையால், பணத்தைப் பகிரும் இடத்துக்கு வரும் காதலன் வால் மற்றும் அவனது கூட்டாளி நடத்தும் துப்பாக்கிச் சண்டையில், ஜானியைத் தவிர அனைவரும் கொல்லப்படுகிறார்கள்.
விதியின் முன் மனிதத் திட்டங்கள் எவ்வளவு பலவீனமானவை என்பதற்கு இப்படத்தின் க்ளைமாக்ஸை சான்றாக வடிவமைத்திருக்கிறார் குப்ரிக். விமான நிலைய ஓடுதளத்தில் ஒரு செல்ல நாய் குறுக்கே ஓட, நிலைதடுமாறிய தள்ளுவண்டி மோதி ஜானியின் பெட்டி உடைய, 2 மில்லியன் டாலர் பணமும் விமான என்ஜின் காற்றில் காகிதங்களாகச் சிதறிப் பறக்கிறது.
போலீஸார் நெருங்க, ‘ஜானி, தப்பித்துவிடு!’ எனக் கதறும் காதலியிடம், ‘இனி என்ன வித்தியாசம்? (What difference does it make?) என்று விரக்தியுடன் கேட்கிறான் ஜானி. எல்லாம் முடிந்த பிறகு மீண்டும் ஓடி என்ன பயன் என்கிற அந்த உளவியல் நிதர்சனம், ரசிகர்களை ஆச்சர்யப்படுத்துகிறது.
ஒளிப்பதிவாளர் லூசியன் பலார்ட், பந்தய மைதானத்தின் பரபரப்பு, டிக்கெட் விற்பனை, குதிரைகளின் வேகம் மற்றும் பார்வையாளர்களின் உணர்ச்சிகளை ஒரு ‘டாக்குமென்டரி’ பாணியில் பதிவு செய்துள்ளார். நேரக் கட்டுப் பாட்டை மையமாகக் கொண்ட இத்திரைக்கதையில், படத்தின் ஒவ்வொரு ஃபிரேமையும் துல்லியமாகச் செதுக்கியுள்ளார்.
படத்தொகுப்பாளர் பெட்டி ஸ்டீன்பெர்க், காலத்தை உடைத்து ஒரே சம்பவத்தைப் பல கோணங்களில் இணைக்கும் ‘நான்-லீனியர்’ உத்தி மூலம் ஒரு புதிய பாணியையே உருவாக்கியுள்ளார். இது பிற்கால ‘ஹீஸ்ட்’ மற்றும் ‘டைம் லூப்’ திரைப்படங்களுக்கு ஒரு முன்மாதிரி. ஜெரால்ட் ஃப்ரைட்-இன் பின்னணி இசை, காட்சிகளில் சஸ்பென்ஸ் ஆரம்பிக்கும் முன்னரே நம்மை தயார்படுத்துகிறது.
படத்தின் விறுவிறுப்புக்கு இசையும் முக்கிய காரணம். படத்தின் தொழில்நுட்ப உச்சமே கொள்ளைச் சம்பவமும், குதிரை சுடப்படும் காட்சியும்தான். ‘டெலிஃபோட்டோ’ லென்ஸ் மூலம் குதிரை சுடப்படுவதையும், அதனால் ஏற்படும் ஒட்டுமொத்தக் குழப்பத்தையும் பயன்படுத்தி கொள்ளையர்கள் கவனத்தைத் திசைதிருப்புவதைத் தொழில்நுட்ப ரீதியாகக் கச்சிதமாகக் காட்டியுள்ளனர்.
பண அறையைச் சூறையாடும் காட்சி எவ்விதப் பின்னணி இசையுமின்றி, அந்த இடத்தின் இயற்கையான சத்தங்களுடன் படமாக்கப்பட்டுள்ளது. ‘த கில்லிங்’ வெளிவந்த காலத்தில் வணிக ரீதியாக வெற்றி பெறாவிட்டாலும், குற்றப்பட வரலாற்றில் நீங்காத் தாக்கத்தை ஏற்படுத்தியது. ‘குற்றவாளிகள் எப்போதும் தண்டிக்கப்படுவார்கள்’ என்ற நீதியைத் தாங்கிய இப்படத்தை, அதன் தொழில்நுட்பச் சிறப்புக்காக இன்றும் ரசிக்கலாம்.
(செவ்வாய்தோறும் படம் பார்ப்போம்)