அபூர்வக் கண்டுபிடிப்பால் அரூபமாகிப் போன ஏழை விஞ்ஞானி, அதீத அதிகாரத்தால் அகிலத்தை ஆள நினைத்துக் காதலியின் முன் தோற்று மடிவதே ‘தி இன்விசிபிள் மேன்’ (THE INVISIBLE MAN – 1933) படத்தின் ஒருவரிக் கதை. பனிப்புயல் வீசும் ஓர் இரவில், முகம் முழுவதும் துணிக்கட்டு, கரிய கண்ணாடி, நீண்ட மேலங்கியுடன் ஒரு மர்ம மனிதன் ‘இப்பிங்’ கிராமத்தின் த லயன்ஸ் ஹெட் விடுதிக்கு வருகிறான்.
அவனது விசித்திரமான தோற்றம் அங்கிருப்பவர்களிடையே சலசலப்பை உருவாக்குகிறது. விடுதி உரிமையாளரின் மனைவி ஜென்னி அவனுக்கு அறை ஒதுக்கிக் கொடுக்கிறாள்.
அவன் முகக்கட்டுகளைக் கழற்றியிருந்த நேரத்தில் உணவு கொண்டு சென்ற ஜென்னி, அவனது கோபத்தையும், முகத்தை மறைக்கும் பதற்றத்தையும் கண்டு திகிலடைகிறாள். மறுபக்கம், புகழ்பெற்ற விஞ்ஞானி டாக்டர் கிரேன்லியின் மகள் புளோரா, காதலன் ஜாக் கிரிஃபின் காணாமல் போனதை எண்ணித் தவிக்கிறாள்.
ஜாக், அபாயகரமான தனி ஆராய்ச்சியில் ஈடுபட்டிருப்பதாகச் சக ஊழியன் கெம்ப் கூறுகிறான். விடுதி அறையில் ரசாயனச் சோதனையில் மூழ்கியிருக்கும் ஜாக், திடீரென அறைக்குள் வந்த ஜென்னியை விரட்டுகிறான். இதனால் எழுந்த வாக்குவாதத்தில், விடுதி உரிமையாளரான ஹாலை மாடிப்படியிலிருந்து ஜாக் தள்ளிவிட போலீஸ் வரவழைக்கப்படுகிறது.
ஆவேசமடையும் ஜாக், தனது செயற்கை மூக்கையும் துணிக் கட்டுகளையும் அவிழ்த்து எறிய, உள்ளே தலை இல்லாததைக் கண்டு மக்கள் அலறுகின்றனர். ஜாக், தன் ஆடைகளைக் கழற்றி எறிந்துவிட்டு முழுமையாக அரூபமாகிறான்.
போலீஸாரை கேலி செய்தபடி அங்கிருந்து தப்பிக்கும் அவன், தெருவிலுள்ள மக்களைச் சீண்டுகிறான்; மிதிவண்டிகள் தானாக ஓடுகின்றன, துடைப்பங்கள் காற்றில் பறக்கின்றன, கற்கள் ஜன்னல்களை உடைக்கின்றன.
ஊரே பீதியில் உறைய, செய்தித்தாள்கள் ‘கண்ணுக்குப் புலப்படாத மனிதனின் கொடூரம்’ என்று தலைப்புச் செய்திகளால் அதிர்கின்றன.
ஜாக் பயன்படுத்திய ‘மோனோகெயின்’ மருந்து, உடலை மறைப் பதோடு மனநிலையையும் சிதைக்கும் என்பதை டாக்டர் கிரேன்லி கண்டறிகிறார்.
இதற்கிடையில், தன் நண்பன் கெம்பின் வீட்டுக்குள் நுழையும் ஜாக், “எனது ஆராய்ச்சியை முடிக்க அமைதியான ஓரிடம் தேவை, நாம் இருவரும் இணைந்து இந்த உலகைப் பயங்கரவாதத்தால் ஆளப்போகிறோம்” என்று மிரட்டுகிறான். கண்ணுக்குத் தெரியாத மனிதனின் அட்டகாசங்களை நம்ப மறுக்கும் போலீஸ் அதிகாரியின் முகத்தில் ஜாக் மையை வீசிவிட்டுத் தப்புகிறான்.
அவனது கொலைவெறி உச்சத்தை எட்டுகிறது; ரயில் சிக்னல்களை மாற்றிப் பெரும் விபத்தை ஏற்படுத்துகிறான். நூற்றுக்கணக்கான அப்பாவி மக்கள் பலியாகிறார்கள். கெம்பின் தகவலால் டாக்டர் கிரேன்லியுடன் வரும் புளோரா, ஜாக்கைத் தனியே சந்திக்கிறாள். ஜாக் அவளிடம், “உனக்காகத்தான் பணத்தையும் புகழையும் அடையப் போராடினேன்.
நான் இப்போது தலைசிறந்த விஞ்ஞானி! இந்த அகிலமே என் காலடியில்” என்று கொக்கரிக்கிறான். புளோரா பதற்றத்துடன், “நீ உட்கொண்ட மருந்து உன் எண்ணங்களைச் சிதைத்துவிட்டது” என்று அவனைத் திருத்த முயல்கிறாள். ஆனால், ஏற்கெனவே அதிகார போதையில் இருந்த அவன் அதை ஏற்கவில்லை.
போலீஸார் வீட்டைச் சூழ, அங்கிருந்து தப்புகிறான் ஜாக். போகுமுன், போலீஸுக்குத் தகவல் சொன்ன கெம்பிடம், “நாளை இரவு 10 மணிக்கு உன்னைக் கொல்வேன்” என்று சவால் விடுத்துச் செல்கிறான். ஜாக்கை வலைவீசிப் பிடிக்க போலீஸார், தேடுதல் வேட்டையில் இறங்குகிறார்கள்.
உலகை ஆட்டிப்படைக்க நினைக்கும் ஜாக், தனது சவாலில் வென்றானா? அல்லது விதியின் சதியால் வீழ்ந்தானா? என்பதே இப்படத்தின் அதிரடி உச்சக்கட்டம்! ஒரு மனிதன் அரூபமாகும்போது அவனது தார்மீகப் பொறுப்புகள் எப்படிச் சிதைகின்றன என்பதை மையமாகக் கொண்டு ஹெச்.ஜி. வெல்ஸ் எழுதிய நாவல்தான் இந்தப் படம்.
ஆர்.சி.ஷெரிஃபின் விறுவிறுப்பான திரைக்கதையில் ‘பிராங்கன்ஸ்டைன்’ புகழ் இயக்குநர் ஜேம்ஸ் வேல் பிரம்மாண்டமாக இயக்கியுள்ளார். இரண்டாம் உலகப்போருக்கு முந்தைய அந்தச் சூழலில், ஒரு தனிமனிதனின் பேராசை ஒட்டுமொத்த உலகையே அச்சுறுத்தும் என்பதை இப்படம் மிக ஆழமாகப் பதிவு செய்தது.
மொத்த நகரத்தையும் பீதிக்குள்ளாக்கிய அந்த அரூப மனிதன், ஒரு வைக்கோற்போரில் உறங்கும்போது பிடிபடுவதும், கண்ணுக்குத் தெரியாதவனைப் பனியில் தோன்றும் அவனது கால்தடங்களை வைத்தே சுட்டுப் பிடிப்பதும் மிகச்சிறந்த திரைக்கதை நுட்பங்கள். அவை படமாக்கப்பட்ட விதமும் காட்சிகளின் கோர்ப்பும் இன்றுவரை ஆச்சர்யப்பட வைக்கிறது.
ஒளிப்பதிவாளர் ஆர்தர் எடிசன், தனது கறுப்பு-வெள்ளை ஒளிப்பதிவில் இப்பிங் கிராமத்தின் பனிப்பொழிவையும், விடுதியின் மர்மமான சூழலையும் தத்ரூபமாகப் படம்பிடித்துள்ளார். ஸ்பெஷல் எஃபெக்ட்ஸ் கலைஞர் ஜான் பி.ஃபுல்டன் உடல் மட்டும் மறையும் காட்சிகளை உருவாக்கப் பயன்படுத்திய ‘டிராவலிங் மேட்’ தொழில்நுட்பம் அன்றைய காலகட்டத்தின் பெரும் அதிசயம்.
பனியில் கால்தடம் மட்டும் தோன்றுவது, ஆளில்லாமல் மிதிவண்டி ஓடுவது, சட்டையும் பேன்ட்டும் காற்றில் நடந்து வருவது போன்ற காட்சிகள் ரசிகர்களுக்குச் சிரிப்பையும் திகிலையும் ஒருசேர அளித்தன. கிராபிக்ஸ் வசதிகள் இல்லாத காலத்திலேயே, ஒரு மர்ம மனிதன் காற்றில் மறைவதையும், தானாகச் சிகரெட் பற்றவைப்பதையும் நுணுக்கமாகக் கையாண்ட விதம் உலக ஒளிப்பதிவுத் துறையை வியக்க வைத்தது.
‘டெட் கென்ட்’டின் படத்தொகுப்பு அரூப மனிதனின் கலவரங்களைக் கச்சிதமாகக் கோர்க்க, ஹைன்ஸ் ரோம்கெல்ட் அமைத்த பின்னணி இசை, படம் முழுவதும் ஒருவித பதைபதைப்பைத் தக்கவைக்கிறது. ஜாக்கின் காதலியாக வரும் குளோரியா ஸ்டூவர்ட், உருவம் இல்லாத காதலனின் வெறும் குரலை மட்டும் கேட்டு, அதற்குத் தகுந்த உணர்ச்சி கரமான பாவனைகளை வெளிப்படுத்திய விதம் அற்புதம்.
1933-ல் இளமை ததும்பும் நாயகியாக நடித்த இவர், சரியாக 64 ஆண்டுகளுக்குப் பிறகு ஜேம்ஸ் கேமரூனின் ‘டைட்டானிக்’ (1997) படத்தில் முதிய வயது ‘ரோஸ்’ கதாபாத்திரத்தில் நடித்து உலகப் புகழ்பெற்றார். ஹாலிவுட்டின் இரு பெரும் காலகட்டங்களைத் தனது நடிப்பின் மூலம் இணைத்துச் சாதனை படைத்த இவருக்கு, 87 வயதில் ஆஸ்கர் பரிந்துரை கிடைத்தது வரலாற்றுச் சான்று.
திரையில் முகம் தெரியாமலேயே தனது காத்திரமான குரலால் ஆணவம், செருக்கு, காதல் என நவரசங்களையும் வெளிப்படுத்திய கிளாட் ரெயின்ஸ், ஜாக் கிரிஃபின் கதாபாத்திரத்துக்கு உயிர் கொடுத்திருப்பார். மரணித்தபின் தன் காதலியின் முன்னால் முதன்முறையாக அவரது முகம் திரையில் தோன்றும் அந்த நெகிழ்ச்சியான காட்சி, இயற்கைக்கு மாறான கண்டுபிடிப்புகள் அழிவிலேயே முடியும் என்ற தத்துவத்தை அழுத்தமாகப் பதிவு செய்கிறது.
இன்று வெளிவரும் பல பாகங்களைக் கொண்ட ‘சீக்குவல்’ திரைப்படக் கலாச்சாரத்துக்கு இப்படமே மிகச்சிறந்த முன்னோடி. இதன் பிரம்மாண்ட வெற்றியே பின்னாளில் பல தொடர் படங்களுக்கு அடித்தளமிட்டது. தொழில்நுட்ப வசதிகள் ஏதுமற்ற 1930-களிலேயே, கண்ணுக்குப் புலப்படாத மனிதனின் சாகசங்களைப் பிரம்மாண்டத் திரை அனுபவமாக வழங்கிய இந்த திகில் காவியத்தை ரசிக்கலாம்.
(செவ்வாய்தோறும் படம் பார்க்கலாம்)
- ramkumaraundipatty@gmail.com