அமெரிக்காவில் கடந்த 2004-முதல் 2007-ம் ஆண்டு வரை மூன்று சீசன்களாக வெளியான சின்னத்திரை தொடர், ‘நெட்’ஸ்டிகிளாசிஃபைட் ஸ்கூல் சர்வைவல் கைடு’.
இதில் மார்ட்டின் என்ற கேரக்டரில் நடித்து ரசிகர்களின் அன்பைப் பெற்றவர் டெய்லர் சேஸ். பின்னர் ‘எவ்ரிபடி ஹேட்ஸ் கிறிஸ்’ என்ற நகைச்சுவைத் தொடரிலும் தோன்றிய அவர், 2007-ம் ஆண்டு ஜேம்ஸ் பிராங்கோவின் ‘குட் டைம் மேக்ஸ்’ என்ற ஹாலிவுட் படம் மூலம் சினிமாவிலும் அறிமுகமானார். அதில் யங் ஆடமாக நடித்திருந்தார். கடைசியாக ‘லா நோயர்’ என்ற வீடியோ கேமில் பணியாற்றினார்.
சின்னத்திரையில் புகழ்பெற்ற நடிகரான இவர், ஒருகட்டத்தில் நடிப்பதிலிருந்து விலகினார். பிறகு என்ன ஆனார் என்று தெரியவில்லை. இந்நிலையில் அவர் கலிபோர்னியாவில் வசிக்க வீடின்றி தெருவில் யாசகம் பெற்று வாழும் வீடியோ இணையத்தில் வேகமாகப் பரவி வருகிறது. 36 வயதான டெய்லர் சேஸ் அந்த வீடியோவில், கிழிந்த ஆடைகளை அணிந்தபடி பேச முடியாமல் தவிக்கிறார்.
தனது தளர்வான கால் சட்டையை, அவிழ்ந்து விடாமல் இருக்கப் பிடித்துக் கொண்டு நிற்பது பரிதாபமாக உள்ளது. ஒரு காலத்தில் பல கேமராக்கள் மற்றும் முன்னணி நட்சத்திரங்களுடன் நின்ற அவர், இப்போது கலிபோர்னியாவின் தெருக்களில் யாசகம் பெற்று வருவது பலரை அதிர்ச்சிக்குள்ளாக்கி உள்ளது. புகழின் உச்சத்தில் இருந்த ஒருவர் எப்படி இப்படியானார் என்று சமூக வலைதளங்களில் ரசிகர்கள் கேட்டு வருகின்றனர்.
