வட இந்தியச் சித்தரான நீம் கரோலி பாபா என்ற மகாராஜ் ஜியின் வாழ்க்கைக் கதையை மையமாகக் கொண்டு உருவாகியுள்ள இந்தி திரைப்படம் ‘ஹனுமன் அன்ஸ்’. விஷால் சதுர்வேதி இயக்கியுள்ள இப்படத்தை ராகிணி, நம்ரதா ஜி.சிங், அனுப்பிரியா ஆகிய 3 பெண்கள் தயாரித்துள்ளனர். இப்படம் நீம் கரோலி பாபாவின் வாழ்க்கை மற்றும் போதனைகளை அடிப்படையாகக் கொண்டது.
ரூ.2 கோடியில் உருவாக்கப்பட்ட இப்படம் இந்தியாவில் இதுவரை ரூ.345 கோடிக்கு மேல் வசூலித்து ஓடிக் கொண்டிருக்கிறது. இப்படம் முதலில், போஸ்ட் புரொடக் ஷனுக்கு பணமில்லாமல் தள்ளிப்போய்க் கொண்டிருந்தது. அப்போது தனது மொத்த சேமிப்பைக் கொடுத்து இணை தயாரிப்பாளர் ஆனார், 21 வயதான அனுப்பிரியா.
அவர் கூறும்போது, “நான் இப்படத்தில் இணைவதற்கு முன்பிருந்தே, ‘ஹனுமன் அன்ஸ்’ குழுவினர் படப்பிடிப்புக்குப் பிந்தைய பணிகளுக்கான முதலீட்டுக்குப் பலரை அணுகினர். அது பெரிய முதலீடு தேவைப்படும் படம் இல்லை என்றாலும், யாரும் முன் வரவில்லை. இப்படத்தை அவர்கள் நம்பவில்லை. பெரிய தாக்கத்தை ஏற்படுத்தாது என்று நினைத்தார்கள். இப்போது படம் வெற்றி பெற்ற பிறகு பல தயாரிப்பாளர்கள் எங்களைத் தொடர்பு கொண்டு பாராட்டினார்கள்.
சிலர், ‘மன்னிப்பு கேட்டுக் கொள்கிறோம்; இந்தப் படம் முதலில் எங்களிடம் வந்தது. உங்களுடன் இணைய முடியாமல் போனதற்கு வருந்துகிறோம். அது நாங்கள் செய்த மிகப்பெரிய தவறு’ என்று கூறினார்கள். “சிறு பட்ஜெட் படத்தால் இவ்வளவு பெரிய விஷயங்களைச் சாதிக்க முடியும் என்பதை நீங்கள் உணர்த்தி இருக்கிறீர்கள்; திரையுலகுக்கு ஒரு பாடத்தையே கற்றுக்கொடுத்துள்ளீர்கள். உங்களுக்கு இப்போது என்ன தேவை என்றாலும் உங்களுடன் துணை நிற்போம் என்றார்கள்’’ எனக் கூறியுள்ளார்.
