நடிகை ரகுல் ப்ரீத் சிங்
நடிகை ரகுல் ப்ரீத் சிங் மற்றும் அவரது மாமனாரும் தயாரிப்பாளருமான வாசு பக்னானி ஆகியோருடன் தொடர்புடைய 12 இடங்களில் சமீபத்தில் வருமான வரித்துறை, சோதனை நடத்தியது.
நிதி முறைகேடு, திரைப்படத் தயாரிப்பு என்ற பெயரில் வெளிநாடுகளுக்கு பணம் கடத்தி வரி ஏய்ப்பு நடந்ததா என்ற சந்தேகத்தின் பேரில் இந்தச் சோதனைகள் நடத்தப்பட்டன. இந்நிலையில், அந்தச் சோதனைக்கும் எனக்கும் எந்தத் தொடர்பும் இல்லை என்று நடிகை ரகுல் ப்ரீத் சிங் தெரிவித்துள்ளார்.
இதுபற்றி அவர் அளித்துள்ள விளக்கத்தில், “அந்தச் சோதனைக்கும் எனக்கும் எந்தத் தொடர்பும் இல்லை. நான் ராணுவப் பின்னணியைக் கொண்டவள்; திரையுலகில் எனக்கு எந்த ஒரு பின்புலமும் கிடையாது என்பதை அனைவரும் அறிவர். கடும் உழைப்பின் மூலமே இந்த இடத்துக்கு வந்துள்ளேன்.
ஒரு பொறுப்புள்ள, சட்டத்தை மதிக்கும் குடிமகளாக, எனது 20-வது வயதிலிருந்தே உரிய வரிகளைச் செலுத்தி வருகிறேன். தனிப்பட்ட முறையிலோ அல்லது எந்தவொரு தயாரிப்பு நிறுவனத்தின் சார்பாகவோ, சட்டவிரோத வெளிநாட்டுப் பணப் பரிமாற்றத்தில் நான் ஈடுபடவில்லை.
மேலும், நாட்டின் எந்தப் பகுதியிலும் அல்லது வெளிநாடுகளிலோ பினாமி சொத்துக்களை நான் வைத்திருக்கவில்லை என்பதையும் சொல்ல விரும்புகிறேன்” என்று தெரிவித்துள்ளார்.
