சென்னை: விரைவில் நடைபெறவுள்ள சப்-இன்ஸ்பெக்டர், அரசு கல்லூரி உதவி பேராசிரியர் பணிகளுக்கான மாதிரி தேர்வுகள் வேலைவாய்ப்பு பயிற்சித் துறையின் இணையதளத்தில் பதிவேற்றம் செய்யப்பட்டுள்ளன. தமிழக அரசின் வேலைவாய்ப்பு மற்றும் பயிற்சித் துறை அரசு பணிகளுக்கு தயாராவோர் பயன்பெறும் வகையில் தமிழ்நாடு கேரியர் சர்வீசஸ் என்ற பிரத்யேக இணையதளத்தை (/www.tamilnaducareerservices.tn.gov.in) இயக்கி வருகிறது.
இதில் டிஎன்பிஎஸ்சி, எஸ்எஸ்சி, ரயில்வே, வங்கி, யுபிஎஸ்சி தேர்வுகளுக்கான பாடத்திட்டங்கள், அவற்றுக்கு படிக்க வேண்டிய நூல்கள், முந்தைய ஆண்டு வினாத்தாள்கள், மாதிரி வினாத்தாள்கள் மற்றும் பொது அறிவு குறிப்புகள், அன்றாட நிகழ்வுகள் என ஏராளமான பயனுள்ள தகவல்கள் இடம்பெற்றுள்ளன. மேலும், தமிழ்நாடு பாடநூல் கழகம், என்சிஇஆர்டி பாடப் புத்தகங்களை பதிவிறக்கம் செய்து கொள்ளவும் இந்த இணையதளத்தில் வசதி செய்யப்பட்டுள்ளது.
அதோடு, போட்டித் தேர்வுகளை தேர்வர்கள் எளிதாக எதிர்கொள்ளும் வகையில் மாதிரி தேர்வுகளும் பதிவேற்றம் செய்யப்பட்டுள்ளன. இந்த மாதிரி தேர்வுகளில் தேர்வர்கள் பங்கேற்று தங்களின் தயாரிப்பு நிலையை அறிந்துகொள்ள முடியும். விரைவில் சப்-இன்ஸ்பெக்டர் தேர்வு மற்றும் அரசுக் கல்லூரி உதவி பேராசிரியர் பணிகளுக்கான தேர்வுகள் நடத்தப்பட உள்ளன.
இதற்கான மாதிரி தேர்வுகளும், உதவி பேராசிரியர் (தமிழ் மற்றும் ஆங்கில பாடம் மட்டும்) மாதிரி தேர்வுகளும் (ஒவ்வொரு பாடத்திட்ட அலகு வாரியாக) இந்த இணையதளத்தில் பதிவேற்றம் செய்யப்பட்டுள்ளன. மாதிரி தேர்வில் பங்கேற்போருக்கு அதன் முடிவு தெரிவிக்கப்பட்டு மதிப்பீட்டு அறிக்கையும் உடனடியாக ஆன்லைனில் வழங்கப்படும் என்று மாநில வேலை வழிகாட்டி மையத்தின் அதிகாரிகள் தெரிவித்தனர்.