போலீஸ் சப்-இன்ஸ்பெக்டர் தேர்வுக்கு ஆன்லைனில் விண்ணப்பிப்பதற்கான கடைசி நாள் மே 10-ம் தேதி வரை நீட்டிக்கப்பட்டுள்ளதாக தமிழ்நாடு சீருடை பணியாளர் தேர்வு வாரியம் அறிவித்துள்ளது.
தமிழக காவல்துறையில் 1,299 சப்-இன்ஸ்பெக்டர் பணியிடங்கள் தமிழ்நாடு சீருடை பணியாளர் தேர்வு வாரியம் மூலம் நேரடியாக நிரப்பப்பட உள்ளன. இதற்கான ஆன்லைன் விண்ணப்பப் பதிவு கடந்த ஏப்.7-ம் தேதி தொடங்கியது. தேர்வுக்கு விண்ணப்பிப்பதற்கான கடைசி நாள் நேற்றுடன் (மே 3) முடிவடைந்தது.
இந்நிலையில், சப்-இன்ஸ்பெக்டர் தேர்வுக்கு ஆன்லைனில் விண்ணப்பிப்பதற்கான கடைசி நாள் மே 10-ம் தேதி வரை நீட்டிக்கப்படுவதாகவும், சமர்ப்பிக்கப்பட்ட ஆன்லைன் விண்ணப்பத்தில் மே 15 வரை திருத்தம் செய்துகொள்ளலாம் என்றும் சீருடை பணியாளர் தேர்வு வாரியம் தெரிவித்துள்ளது.
சப்-இன்ஸ்பெக்டர் தேர்வுக்கு ஏதேனும் ஒரு பாடத்தில் பட்டம் பெற்றவர்கள் விண்ணப்பிக்கலாம். வயது வரம்பு பொதுப்பிரிவினருக்கு 30 ஆகவும், பிசி, பிசி-முஸ்லிம், எம்பிசி வகுப்பினருக்கு 32 ஆகவும், எஸ்சி, எஸ்டி பிரிவினர் மற்றும் 3-ம் பாலினத்தினருக்கு 35 ஆகவும், ஆதரவற்ற விதவைகளுக்கு 37 ஆகவும் நிர்ணயிக்கப்பட்டு உள்ளது.
தமிழ்நாடு சீருடை பணியாளர் தேர்வு வாரியத்தின் இணையதளத்தில் (www.tnusrb.tn.gov.in) விண்ணப்பிக்க வேண்டும். உடற்தகுதி, தேர்வுமுறை, ஆன்லைனில் விண்ணப்பிக்கும் முறை உள்ளிட்ட அனைத்து விவரங்களையும் இணையதளத்தில் தெரிந்துகொள்ளலாம் என அறிவிக்கப்பட்டுள்ளது.