மும்பை: தொழில் போட்டிக்கு நாங்கள் ஒருபோதும் அஞ்ச மாட்டோம் என்று ரிலையன்ஸ் நிறுவனம் தெரிவித்துள்ளது. அமெரிக்காவின் ஸ்டார்லிங்க் நிறுவனம் உலகின் பல்வேறு நாடுகளில் செயற்கைக்கோள் இணைய சேவையை வழங்கி வருகிறது. இந்த நிறுவனம் சார்பில் இந்தியாவில் இணைய சேவை தொடங்க உரிமம் கோரி மத்திய அரசிடம் விண்ணப்பம் அளிக்கப்பட்டு உள்ளது.
இதுதொடர்பாக ஸ்டார்லிங்க் நிறுவனர் எலான் மஸ்க் சமூக வலைதளத்தில் அண்மையில் வெளியிட்ட பதிவில், “165 நாடுகளில் ஸ்டார்லிங்க் நிறுவனம் உரிமம் பெற்று உள்ளது. ஆனால் இந்தியாவில் உரிமம் பெற 5 ஆண்டுகளாக காத்திருக்கிறோம். அந்த நாட்டின் உண்மையான பிரதமர் முகேஷ் அம்பானி. தொழில் போட்டிக்கு அஞ்சி இந்தியாவில் ஸ்டார்லிங்க் சேவையை தொடங்கவிடாமல் அவர் முட்டுக்கட்டை போட்டு வருகிறார்" என்று குற்றம் சாட்டினார்.
இதுகுறித்து முகேஷ் அம்பானி தலைமையிலான ரிலையன்ஸ் இண்டஸ்ட்ரீஸ் நிறுவனம் சமூக வலைதளத்தில் நேற்று வெளியிட்ட பதிவில் கூறியிருப்பதாவது: ரிலையன்ஸ் நிறுவனம் மற்றும் இந்திய சந்தை குறித்து அண்மையில் வெளியான கருத்துகளுக்கு பதில் அளிக்க கடமைப்பட்டு உள்ளோம்.
நாங்கள் உள்நாட்டில் தொடங்கப்பட்ட நிறுவனம். முதலீடுகள் மற்றும் புதுமை கண்டுபிடிப்புகளை வரவேற்கிறோம். உள்நாட்டிலும், வெளிநாடுகளிலும் மக்களின் வாழ்க்கைத் தரத்தை மேம்படுத்த பாடுபடுகிறோம்.
இந்திய தொலைத்தொடர்பு துறை நடுநிலையுடன் செயல்படுகிறது. சட்ட விதிகளுக்கு உட்பட்டே விண்ணப்பங்கள் பரிசீலிக்கப்படுகின்றன என்று மத்திய அரசு ஏற்கெனவே விளக்கம் அளித்து உள்ளது. இது ஒவ்வொரு விண்ணப்பதாரருக்கும் பொருந்தும். இதில் உள்நாடு, வெளிநாட்டு நிறுவனம் என்ற பாகுபாடு கிடையாது. ஜியோவின் செயற்கைக்கோள் இணைய சேவைக்கான உரிமத்தைப் பெற நாங்களும் நீண்ட காலமாக காத்திருக்கிறோம்.
நாங்கள் தொழில் போட்டிக்கு ஒருபோதும் அஞ்ச மாட்டோம். கடந்த 2016-ல் இந்திய தொலைத்தொடர்பு சந்தையில் கால் பதித்தோம். அப்போது கடும் போட்டி நிலவியது.
கடந்த 10 ஆண்டுகளில் 53 கோடி வாடிக்கையாளர்களைப் பெற்று உள்ளோம். உலக நாடுகளுடன் ஒப்பிடும்போது மிகக் குறைந்த விலையில் டேட்டாவை வழங்கி வருகிறோம். செயற்கைக்கோள் இணைய சேவையில் ஸ்டார்லிங்க் உள்ளிட்ட நிறுவனங்களுடன் ஆரோக்கியமான போட்டியை எதிர்கொள்ள தயாராக உள்ளோம். இவ்வாறு அதில் கூறப்பட்டுள்ளது.
