மும்பை: இந்தியப் பங்குச்சந்தைகள் தொடர்ந்து 4-வது நாளாக ஏற்றத்துடன் நிறைவடைந்தன. சென்செக்ஸ் 1,200 புள்ளிகளுக்கு மேலும், நிஃப்டி 370 புள்ளிகளுக்கு மேலும் உயர்ந்து முதலீட்டாளர்களை மகிழ்ச்சியில் ஆழ்த்தின.
இந்திய பங்குச் சந்தைகள் கடந்த வியாழன், வெள்ளி, திங்கள் ஆகிய 3 நாடகளாக தொடர்ந்து ஏறுமுகமாக இருந்தன. 4-வது நாளாக நேற்றும் கணிசமாக உயர்ந்தன. மும்பை பங்குச்சந்தைக் குறியீடான சென்செக்ஸ், நேற்றைய வர்த்தக முடிவில் 1,225 புள்ளிகள் (1.62%) உயர்ந்து 76,917.85 புள்ளிகளில் நிறைவடைந்தது. தேசிய பங்குச்சந்தைக் குறியீ்டு நிஃப்டி 370 புள்ளிகள் (1.58%) உயர்ந்து 23,810.85 புள்ளிகளில் நிலைகொண்டது.
பொதுவாக நிப்டியின் அனைத்து குறியீடுகளும் நேற்று உயர்வுடன் முடிந்தன. நுகர்வோர் சாதனங்கள் மற்றும் எப்.எம்.சி.ஜி. பங்குகள் மீது முதலீட்டாளர்கள் காட்டிய ஆர்வம் காரணமாக, ‘நிஃப்டி எப்.எம்.சி.ஜி.’ குறியீடு அதிக அளவாக 3.65% உயர்ந்தது. நிறுவனங்கள் வெளியிட்டு வரும் 2-ம் காலாண்டு நிதிநிலை முடிவுகள் எதிர்பார்த்ததை விடச் சிறப்பாக இருப்பது, கச்சா எண்ணெய் விலை குறைந்தது உள்ளிட்டவை சந்தை உயர்வுக்கு காரணமாக அமைந்தது.
மேலும் சர்வதேச அளவில் ஏ.ஐ. மற்றும் தொழில்நுட்பப் பங்குகளிலிருந்து வெளியேறிய முதலீடுகள், இந்தியப் பங்குச்சந்தை போன்ற பாரம்பரியச் சந்தைகளை நோக்கித் திரும்பியதும் இந்த உயர்வுக்கு முக்கியக் காரணமாக கூறப்படுகிறது.
