போபால்: மத்திய பிரதேசத்தில் ஆண்டுதோறும் நடைபெறும் பாரம்பரிய கழுதை சந்தையில் பாலிவுட் நடிகர்களின் பெயர் சூட்டப்பட்ட கழுதைகள் கவனம் ஈர்த்தன.
மத்திய பிரதேச மாநிலம் சத்னா மாவட்டத்தில் உள்ள சித்திரகூட் நகரில் ஒவ்வொரு ஆண்டும், தீபாவளி முடிந்தவுடன் மந்தாகினி ஆற்றங்கரையில் கழுதை சந்தை நடத்தப்படுகிறது. இது வரலாறு மற்றும் பாரம்பரியத்தின் சின்னமாகவும் விளங்குகிறது. ஏனெனில், இந்தச் சந்தை முகலாயப் பேரரசர் அவுரங்கசீப்பின் ஆட்சிக் காலத்திலிருந்தே செயல்பட்டு வருவதாக உள்ளூர் மக்கள் கூறுகின்றனர்.
அக்காலத்தில் ராணுவப் பொருட்கள் மற்றும் உணவுப் பொருட்களைக் கொண்டு செல்வதற்காக கழுதைகள் பரவலாகப் பயன்படுத்தப்பட்டதாக நம்பப்படுகிறது.
காலப்போக்கில், தீபாவளியை ஒட்டி இந்தச் சந்தை நடத்தும் பாரம்பரியம் வேரூன்றி, இன்றுவரை தொடர்கிறது. அந்த வகையில், இந்த ஆண்டும் சித்திரகூட் நகரில் கழுதை சந்தை நேற்று முன்தினம் நடந்தது. மத்திய பிரதேசம், சத்தீஸ்கர், பஞ்சாப் மற்றும் ராஜஸ்தான் உள்ளிட்ட நாட்டின் பல்வேறு பகுதிகளிலிருந்து வியாபாரிகள் தங்கள் கழுதைகளுடன் வந்தனர். அவற்றை வாங்குவதற்காக அதிகாலையிலேயே சந்தையில் பெருங்கூட்டம் திரண்டது.
இந்த சந்தையில் கழுதைகளின் உடல் தோற்றம், அவற்றின் விலைகள் கவனம் பெற்றதைவிட, கழுதைகளின் பெயர்களே பார்வையாளர்களின் கவனத்தை பெரிதும் ஈர்த்தன. வியாபாரிகள் தங்கள் கழுதைகளுக்கு பிரபலமான பாலிவுட் பிரபலங்களின் பெயர்களைச் சூட்டியிருந்தனர்.
ரூ.50,000-க்கு அமிதாப், ஷாருக்
இருப்பினும், விலை நிர்ணயத்தைப் பொறுத்தவரை, ஒரு கழுதையின் மதிப்பு அதன் இனம், உயரம், உடல் அமைப்பு, நீளம் மற்றும் வலிமையைப் பொறுத்து நிர்ணயிக்கப்பட்டது. இந்த ஆண்டு, அமிதாப் பச்சன், ஷாருக் கான் மற்றும் மிதுன் சக்ரவர்த்தி ஆகியோரின் பெயர்களைக் கொண்ட கழுதைகள் ஒவ்வொன்றும் ரூ.50,000-க்கும் குறைவான விலைக்கு விற்கப்பட்டன.
ஆனால், சங்கி பாண்டே பெயரை கொண்ட கருப்பு நிற கழுதை கடும் போட்டிக்கு ஏலம் கேட்கப்பட்டு, இறுதியில் ரூ.72,000-க்கு விற்கப்பட்டது. இதன் மூலம், சங்கி பாண்டே விலையுயர்ந்த கழுதையாக உருவெடுத்து, அமிதாப், மிதுன் மற்றும் ஷாருக் ஆகியவற்றையும் பின்னுக்குத் தள்ளியது.
