“இந்தியா மீதான பார்வையை மாற்றுங்கள்” - ஜப்பான் நிறுவனங்களுக்கு ஜெய்சங்கர் வலியுறுத்தல்

“இந்தியா மீதான பார்வையை மாற்றுங்கள்” - ஜப்பான் நிறுவனங்களுக்கு ஜெய்சங்கர் வலியுறுத்தல்
Updated on: 
2 min read

புதுடெல்லி: இந்தியா குறித்த தங்கள் பார்வையை ஜப்பானிய நிறுவனங்கள் மாற்றிக்கொள்ள வேண்டும் என வெளியுறவுத் துறை அமைச்சர் எஸ்.ஜெய்சங்கர் கேட்டுக்கொண்டார். 2014 முதல் இந்தியாவின் உள்கட்டமைப்பு மற்றும் வணிகச் சூழலில் பெரும் மாற்றங்கள் ஏற்பட்டுள்ளதாகவும் அவர் குறிப்பிட்டுள்ளார்.

ஜப்பானில் நடைபெறும் ‘ரைசினா-டோக்கியோ 2026’ உச்சி மாநாட்டில் கலந்து கொள்ள வெளியுறவுத்துறை அமைச்சர் எஸ்.ஜெய்சங்கர் டோக்கியோ சென்றிருந்தார். நவம்பர் 18 முதல் 20 வரை ஜப்பானில் சுற்றுப்பயணம் மேற்கொண்ட அவர், டோக்கியோவின் மூன்றாவது ‘ரைசினா-டோக்கியோ’ உச்சி மாநாட்டில் உரையாற்றுகையில், “ஜப்பானிய நிறுவனங்கள், இந்தியா குறித்த பழைய கண்ணோட்டத்திலேயே நீடிக்காமல், தற்போதைய மாற்றங்களுக்கு ஏற்ப தங்கள் பார்வையை மாற்றிக்கொள்ள வேண்டும்.

இந்தியாவின் பொருளாதாரமும், உலக அரங்கில் அதன் ஈடுபாடும் வளர்ந்து வருகிறது. இந்தியாவில் வணிகம் செய்வது முன்பை விட எளிதாகவும் திறமையாகவும் மாறியுள்ளது. இந்தியாவில் ஏற்பட்டுள்ள மாற்றங்களைப் புரிந்துகொள்ளுங்கள். குறிப்பாக 2014 ஆம் ஆண்டு முதல் இந்தியா பெரும் மாற்றத்தைச் சந்தித்துள்ளது. இதனால் இங்கு வணிகம் செய்வது எளிதாகவும், திறமையாகவும் மாறியுள்ளது.

இந்த மாற்றம், குறிப்பாக நெடுஞ்சாலைகள், துறைமுகங்கள், விமான நிலையங்கள், ரயில்வே மற்றும் எரிசக்தி உள்ளிட்ட உள்கட்டமைப்புத் துறைகளில் தெளிவாகத் தெரிகிறது.

இந்தியாவின் பொருளாதார மாற்றம் மற்றும் உலக அரங்கில் அதன் வளர்ந்து வரும் ஈடுபாடு, இந்தியா-ஜப்பான் இடையிலான ஒத்துழைப்பை மேலும் வலுப்படுத்துவதற்கான வாய்ப்புகளை ஏற்படுத்தி உள்ளன.

நாம் இந்தியாவைப் புதிய கோணத்தில் பார்க்க வேண்டும்; பழைய பிம்பங்களிலேயே சிக்கியிருக்கக் கூடாது. இந்தியா மீதான பார்வையை மாற்றிக்கொள்ளுங்கள்.” என வலியுறுத்தினார்.

இந்தப் பயணத்தில் அமைச்சர் ஜெய்சங்கருடன் பாதுகாப்புத் துறை அமைச்சர் ராஜ்நாத் சிங்கும் இணைந்திருந்தார். இருவரும், ஜப்பானின் வெளியுறவுத்துறை அமைச்சர் தோஷிமிட்சு மொடெகி மற்றும் பாதுகாப்புத்துறை அமைச்சர் ஷின்ஜிரோ கொய்சுமி ஆகியோரைச் சந்தித்தனர்.

இருவரும் நான்காவது, இந்தியா-ஜப்பான் வெளியுறவு மற்றும் பாதுகாப்பு அமைச்சர்கள் அளவிலான பேச்சுவார்த்தையில் பங்கேற்றனர். இந்தோ-பசிபிக் பிராந்தியத்தில் ஒத்துழைப்பை மேம்படுத்துவது குறித்து இதில் விவாதிக்கப்பட்டது.

இந்த பேச்சுவார்த்தையின் போது, இரு நாட்டு அமைச்சர்களும் சுதந்திரமான, வெளிப்படையான மற்றும் விதிகளுக்கு உட்பட்ட இந்தோ - பசிபிக் பிராந்தியத்தை ஊக்குவிப்பதற்கான தங்கள் உறுதிப்பாட்டை மீண்டும் வலியுறுத்தினர்.

மேலும், பாதுகாப்பு மற்றும் பாதுகாப்பு ஒத்துழைப்பில் ஏற்பட்டுள்ள முன்னேற்றங்களை ஆய்வு செய்த அவர்கள், பாதுகாப்புப் பயிற்சிகள், பாதுகாப்புத் தொழில், கடல்சார் பாதுகாப்பு, சைபர் பாதுகாப்பு மற்றும் விண்வெளித் துறைகளில் ஒத்துழைப்பை மேலும் ஆழப்படுத்த ஒப்புக்கொண்டனர்.

இந்தியாவில் உள்ள துப்பாக்கிச் சூடு பயிற்சித் தளங்களைப் பயன்படுத்துவது குறித்த புரிந்துணர்வு கடிதத்தில் ஜப்பான் தற்காப்புப் படைகள் கையெழுத்திட்டதை அமைச்சர்கள் வரவேற்றனர்.

மேலும், முக்கியத்துவம் வாய்ந்த துறைகளில் திட்ட அடிப்படையிலான பொருளாதார மற்றும் பாதுகாப்பு ஒத்துழைப்பை முன்னெடுத்துச் செல்ல இருநாடுகளின் பிரதிநிதிகளும் ஒப்புக்கொண்டனர். பயங்கரவாதத்தின் அனைத்து வடிவங்களையும், வெளிப்பாடுகளையும் ஒழிப்பதற்கான தங்கள் உறுதிப்பாட்டை இரு நாடுகளும் மீண்டும் வலியுறுத்தின.

வளர்ந்து வரும் தொழில்நுட்பங்கள், குறைக்கடத்திகள், முக்கியமான கனிமங்கள், செயற்கை நுண்ணறிவு, டிஜிட்டல் பொது உள்கட்டமைப்பு, தொலைத்தொடர்பு மற்றும் மேம்பட்ட உற்பத்தித் துறை ஆகியவற்றில் ஒத்துழைப்பை மேம்படுத்துவது குறித்து இந்த உரையாடலில் விவாதிக்கப்பட்டது.

மேலும், இந்தியாவில் ஜப்பானிய முதலீடுகளை அதிகரிப்பதற்கான முயற்சிகள் உட்பட, பொருளாதார மற்றும் வணிக ஒத்துழைப்பில் ஏற்பட்டுள்ள முன்னேற்றங்களை அமைச்சர்கள் ஆய்வு செய்தனர்.

“இந்தியா மீதான பார்வையை மாற்றுங்கள்” - ஜப்பான் நிறுவனங்களுக்கு ஜெய்சங்கர் வலியுறுத்தல்
“கர்நாடகாவில் தண்ணீர் இருந்தால் நிச்சயம் தமிழகத்துக்கு தருவோம்” - டி.கே.சிவகுமார்

X