நியூயார்க்: பாகிஸ்தானின் எல்லை தாண்டிய தீவிரவாதத்தை அமெரிக்கா புரிந்து கொள்ளவில்லை என்று மத்திய வெளியுறவு அமைச்சர் ஜெய்சங்கர் தெரிவித்துள்ளார்.
அமெரிக்காவின் நியூயார்க் நகரில் ஐ.நா. பொது சபை கூட்டம் நடைபெறுகிறது. இதில் கடந்த 26-ம் தேதி மத்திய வெளியுறவு அமைச்சர் ஜெய்சங்கர் பேசினார். அப்போது தீவிரவாதத்துக்கு எதிரான இந்தியாவின் போர் தொடரும் என்று அவர் உறுதிபடத் தெரிவித்தார். மேலும் பாகிஸ்தானின் பெயரைக் குறிப்பிடாமல் அந்த நாட்டின் தீவிரவாத ஆதரவு கொள்கையை மிகக் கடுமையாக கண்டித்தார்.
இதைத் தொடர்ந்து நியூயார்க்கில் ஆசியா சொசைட்டி அமைப்புக்கு அமைச்சர் ஜெய்சங்கர் அளித்த பேட்டியில் கூறியிருப்பதாவது: பல தசாப்தங்களாக எல்லை தாண்டிய தீவிரவாத பிரச்சினையை இந்தியா எதிர்கொண்டு வருகிறது. அண்டை நாட்டைச் (பாகிஸ்தான்) சேர்ந்த தீவிரவாத அமைப்புகள் தொடர்ந்து இந்தியாவுக்கு எதிராக செயல்பட்டு வருகின்றன.
அந்த நாடு தீவிரவாதிகளுக்கு அடைக்கலம் அளித்து வருகிறது. இந்த எல்லை தாண்டிய தீவிரவாத பிரச்சினையை அமெரிக்கா முழுமையாக புரிந்து கொள்ளவில்லை. இதன் காரணமாக இந்தியா, அமெரிக்கா இடையிலான உறவில் பாதிப்புகள் ஏற்பட்டு உள்ளன.
அமெரிக்காவுடன் மட்டுமே இந்தியா நட்புறவைப் பேண வேண்டும் என்று ஒரு காலத்தில் அமெரிக்க அரசு வலியுறுத்தி வந்தது. ஆனால் இந்திய அரசு அனைத்து நாடுகளுடனும் சமமான நட்புறவைப் பேணி வந்தது. தற்போது இந்தியாவின் கொள்கையை அமெரிக்கா பின்பற்றத் தொடங்கி உள்ளது. ஐரோப்பிய நாடுகள் மட்டுமன்றி சீனா, ரஷ்யா உள்ளிட்ட நாடுகளுடனும் அமெரிக்கா நட்புறவை ஏற்படுத்தி உள்ளது.
அமெரிக்காவின் வரி விதிப்பு காரணமாக இந்தியா, அமெரிக்கா உறவில் பிரச்சினைகள் எழுந்துள்ளன. பல்வேறு நாடுகளும் இதே பிரச்சினையை எதிர்கொண்டு உள்ளன. இந்தியா, அமெரிக்கா இடையே வர்த்தக ஒப்பந்தம் இறுதியானால் இரு நாடுகள் இடையிலான உறவு மேம்படும். இவ்வாறு அமைச்சர் ஜெய்சங்கர் பேசினார்.