உலகெங்கிலும் உள்ள கோடிக்கணக்கான வீரர்களையும் ஆர்வலர்களையும் இணைக்கும் மிகப்பெரிய இணையவழி செஸ் தளம்தான் Chess.com. விளையாட வாய்ப்பளிப்பது, கற்பிப்பது ஆகியவற்றைக் கடந்து, இந்தத் தளம் தற்போது அதிநவீனச் செய்யறிவுத் தொழில்நுட்பங்களைப் பயன்படுத்தி வீரர்களின் திறனை அடுத்த கட்டத்துக்கு உயர்த்தவும் உதவுகிறது.
தொடக்கநிலையாளர்கள் முதல் கிராண்ட்மாஸ்டர்கள் வரை அனைவருக்கும் ஏற்ற வகையிலான விளையாட்டுகள், புதிர்கள், செய்யறிவு சார்ந்த வழிகாட்டல்களை இந்தத் தளம் வழங்குகிறது.
பாட்களும் இயந்திரங்களும் (Bots & Chess Engines)
பல்வேறு திறன்கள் கொண்ட பல நூறு செய்யறிவு செஸ் பாட்களுடன் (Chess Bots) பயனர்கள் எப்போது வேண்டுமானாலும் விளையாடிப் பயிற்சி பெறலாம். திறன்மிகுந்த Komodo போன்ற இயந்திரங்கள் இதன் பின்னணியில் உள்ளன.
மதிப்பாய்வும் பயிற்சியாளர்களும் (AI Game Review & Coach)
நாம் விளையாடி முடித்த போட்டியை, செய்யறிவுப் பகுப்பாய்வு இயந்திரம் நகர்வு வாரியாக ஆய்வு செய்கிறது. எந்த நகர்வு தவறானது, எது சிறப்பானது என்பதை விளக்கி, எப்படி மேம்படுத்திக் கொள்ள வேண்டும் என்பதற்கான ஆலோசனைகளையும் இது வழங்குகிறது. இதற்காக இந்தத் தளம் ‘Stockfish’ சதுரங்க இயந்திரத்தைப் பயன்படுத்துகிறது.
ஏமாற்று வேலைகளைத் தடுத்தல் (AI Fair Play & Anti-Cheating)
விளையாட்டின்போது நேர்மையை உறுதிசெய்வதற்காக, வீரர்களின் நகர்வுத் தரமும், முடிவு எடுக்கும் நேரமும் இயந்திரக்கற்றல் வழிமுறைகள் வழியே பகுப்பாய்வு செய்யப்படுகின்றன. சந்தேகத்திற்குரிய கணக்குகள் நிபுணர்களாலும் ஆய்வு செய்யப்படுகின்றன. விதிமீறல்கள் உறுதிசெய்யப்பட்டால், சம்பந்தப்பட்ட கணக்குகள் மீது தடை உள்ளிட்ட நடவடிக்கைகள் மேற்கொள்ளப்படுகின்றன.
புதிர்களும் பாடங்களும் (Puzzles & Lessons)
தனிப்பட்ட தந்திரங்களைக் கற்றுத்தரும் ஆயிரக்கணக்கான செஸ் புதிர்களும், அனைத்து நிலைகளுக்கும் ஏற்ற பாடங்களும் இதில் உள்ளன.
புள்ளிவிவரங்களும் பகுப்பாய்வும் (Advanced Stats)
வீரர்களின் வெற்றி விகிதங்கள், பலவீனமான கட்டங்கள், எந்தெந்த இடங்களில் (Openings) அதிகமான பிழைகளைச் செய்கிறார்கள் என்பதையெல்லாம் காட்டும் விரிவான புள்ளிவிவர அறிவிக்கை இதன் இன்னொரு சிறப்பாகும்.
போட்டி சார்ந்த செய்திகள் (Global Events & News)
சர்வதேச நிகழ்வுகள், உயர்தரப் போட்டிகளைப் பின்தொடரவும், செஸ் சார்ந்த அண்மைச் செய்திகளை உடனுக்குடன் தெரிந்துகொள்ளவும் சிறப்புப் பகுதிகள் உள்ளன. மேலும் உலகளாவிய போட்டிகளை நேரலையில் காணும் வசதியும் இதில் வழங்கப்பட்டுள்ளது. இந்தத் தளத்தில் அடிப்படை வசதிகள் கட்டணமின்றிக் கிடைத்தாலும், விரிவான செய்யறிவுப் பகுப்பாய்வு, தனிப்பயன் பயிற்சி வசதி உள்ளிட்டவற்றைப் பயன்படுத்தக் கட்டணம் செலுத்த வேண்டியிருக்கும்.
பிற கருவிகளிலிருந்து இது எவ்வாறு வேறுபடுகிறது?
பாரம்பரியமான செஸ் பலகைகளைப் பயன்படுத்தி விளையாட மட்டுமே முடியும். பயனர் தாம் விளையாடிய விதத்தைப் பகுப்பாய்வு செய்து திருத்திக் கொள்ள முடியாது. ஏனைய சில ஆன்லைன் செஸ் தளங்களில் விளையாடும், புதிர்களுக்குத் தீர்வு காணும், நகர்வுகளைப் பகுப்பாய்வு செய்யும் வசதிகள் உள்ளன.
ஆனால், Chess.com தளம் பல்வேறு திறன்களைக் கொண்ட சதுரங்க பாட்கள், மெய்நிகர் பயிற்சியாளர்கள், நகர்வு வாரியான விளக்கங்கள், ஒழுங்கமைக்கப்பட்ட பாடங்கள், விளையாட்டுச் செயல்திறன் மதிப்பீடுகள் ஆகியவற்றை ஒருங்கிணைத்து ஒரே இடத்தில் வழங்குகிறது. இதன் மூலம் பயனர்கள் விளையாடுவதோடு தங்களது தவறுகளையும் கண்டறிந்து, படிப்படியாகத் திறனை மேம்படுத்திக் கொள்ள வாய்ப்புக் கிடைக்கிறது.
யாருக்கு இது மிகவும் பயன்படும்?
செஸ் கற்க விரும்பும் குழந்தைகள், மாணவர்கள், தொழில்முறை வீரர்கள். செஸ் கலையை எளிமையாகக் கற்றுத் தருவதோடு, வீரர்களின் திறனை மேம்படுத்துவதிலும் Chess.com தளம் இன்றியமையாத பங்கை வகிக்கிறது.
செய்யறிவு விதி
செய்யறிவு தரும் நீண்ட விளக்கங்களைச் சுருக்கி உங்கள் குறிப்பேட்டில் எழுதுங்கள். எழுதுவது நினைவாற்றலைப் பெருமளவு அதிகரிக்கும். செய்யறிவுக் குறிப்புகளில் இருந்து உங்களுக்கான சொந்தப் பாடப்புத்தகத்தை உருவாக்கிக்கொள்ளுங்கள். அது உங்கள் புரிதலை அடுத்த நிலைக்கு எடுத்துச் செல்லும்.
https://www.chess.com/
- மேலும் கற்கலாம்.
- கட்டுரையாளர், பேராசிரியர், தொழில்நுட்ப எழுத்தாளர்.