வீட்டுமனைத் திட்டம், உட்புற வடிவமைப்பு (Interior Design) போன்ற கட்டிடக்கலை வரைபடங்களை உருவாக்குவதற்குப் பல வாரங்கள்கூட ஆகும். பாரம்பரிய வடிவமைப்பு மென்பொருள்களில் சுவர்கள், அறைகள், அளவீடுகளை முறையாக வரைவதற்குப் பெரும் உழைப்பும் திறமையும் தேவை. இதற்கான தீர்வாக உருவெடுத்துள்ளது Maket AI என்னும் செய்யறிவுத் தளம்.
கட்டிடத்தில் இருக்க வேண்டிய அறைகளின் எண்ணிக்கை, பரிமாணங்கள், ஏனைய தேவைகளை (Adjacency Constraints) உள்ளீடு செய்த உடனேயே தள வரைபடங்களை (Floor Plans) உருவாக்கித் தந்துவிடுகிறது இக்கருவி.
ஆக்கமுறை தள வரைபட உருவாக்கம் (Generative Floor Plan Generation)
Maket AI தளத்தில் பயனர்கள் தங்களுக்குத் தேவையான படுக்கையறைகள், குளியலறைகள், சமையலறைகளின் எண்ணிக்கையைக் குறிப்பிட்டு, அவற்றின் அளவுகளையும் (Dimensions) தட்டச்சு செய்ய வேண்டும். அத்துடன், எந்த அறை எங்கே இருக்க வேண்டும் என்பதையும் (Room Adjacency) பயனரே நிர்ணயிக்கலாம். தரப்படும் தகவல்களுக்கு ஏற்ப, இக்கருவி தள வரைபடங்களை உருவாக்கி வழங்குகிறது.
பல மாடிக் கட்டிட வடிவமைப்பு (Multi-Story Plan Generation)
ஒற்றைத் தள வீடுகள் மட்டுமல்லாது பல்லடுக்குகளைக் கொண்ட (Multi-story up to 4 floors) குடியிருப்புகளையும் இத்தளத்தில் உருவாக்க முடியும். மாடிகளுக்கு இடையேயான படிக்கட்டு அமைப்புகளைக்கூட இது துல்லியமாகக் கணக்கிட்டு வடிவமைக்கிறது.
முப்பரிமாணக் காட்சிப்படுத்தல் (3D Visualization)
இரு பரிமாண (2D) வரைபடங்களை உருவாக்குவதோடு அவற்றை முப்பரிமாணக் காட்சிகளாகவும் (3D Renders) மாற்றிக்காட்ட இத்தளம் உதவுகிறது. இதன் மூலம் வாடிக்கையாளர்கள் தாங்கள் கட்டவிருக்கும் வீட்டின் உட்புறத் தோற்றத்தை முன்கூட்டியே தெளிவாகப் புரிந்து கொள்ள முடியும்.
மெய்நிகர் வடிவமைப்பும் வடிவமைப்பு மாற்றங்களும் (Virtual Designer & Restyling)
உருவாக்கப்பட்ட அறைகளை பல்வேறு பாணிகளில் (Styles) காட்சிப்படுத்த உதவும் ‘Virtual Designer’ வசதியும் இதில் உள்ளது. பயனர்கள் தங்களுக்குப் பிடித்தமான வண்ணங்கள், அறைக்கலன்கள் (Furniture), அலங்காரங்களைக் கட்டளைகள் (Prompts) மூலம் எளிதாக மாற்றியமைக்க முடியும்.
குறைந்த நேரத்தில் அடிப்படை வடிவமைப்பு (Time Efficiency & Prototyping)
முதற்கட்ட வடிவமைப்புகளை (Concept Generation) மிக விரைவாகச் சோதித்துப் பார்க்க இத்தளம் உதவுகிறது. இதன் மூலம் வாடிக்கையாளர்களின் எதிர்பார்ப்புக்கு ஏற்றவாறு உடனுக்குடன் வடிவமைப்பில் மாற்றங்களைச் செய்துகாட்ட முடிகிறது.
பிற செய்யறிவுக் கருவிகளில் இருந்து இது எவ்வாறு வேறுபடுகிறது?
AutoCAD போன்ற கருவிகளில் சுவர் உள்ளிட்ட ஒவ்வொரு பாகத்தையும் துல்லியமாக வரைவதற்குத் தேர்ந்த தொழில்நுட்பத் திறனும் அதிக நேரமும் தேவைப்படும். ஆனால், Maket AI கருவியோ, வெறும் சொற்களின் வழியே பயனர் உள்ளிடும் அளவீடுகளைக் கொண்டே உடனடியாகத் ஆரம்பக்கட்ட வரைபடங்களை (Schematic Designs) உருவாக்கித் தந்துவிடுகிறது.
யாருக்கு இது மிகவும் பயன்படும்?
இது பொறியாளர்கள், கட்டிடக்கலை வல்லுநர்கள் (Architects), ஒப்பந்ததாரர்கள், வீட்டுமனை வர்த்தகர்கள், கட்டிடக்கலை மாணவர்களுக்குப் பயன்படுகிறது. மனிதர்களின் கற்பனைத் திறனையும் கணினி ஆற்றலையும் ஒன்றிணைத்து எளிய முறையில், வேகமாகக் கட்டிடங்களை வடிவமைக்க Maket AI பெரிதும் உதவுகிறது. https://app.maket.ai/
செய்யறிவு விதி
செய்யறிவால் உருவாக்கப்பட்ட படங்கள், உரைகள், ஏனைய படைப்புகளை வணிக ரீதியாகப் பயன்படுத்துவதற்கு அனுமதி இருக்கிறதா எனச் சரி பார்த்துக்கொள்ளுங்கள். பதிப்புரிமைச் சட்டங்களை எப்போதும் மதியுங்கள். சட்டத்துக்கு உட்பட்ட முறையில் மட்டுமே செய்யறிவைப் பயன்படுத்துங்கள். எடுத்துக்காட்டாக ஒரு கட்டளை: Generate a residential floor plan for a 40x40 feet plot, including 2 bedrooms with attached bathrooms, a study room, open kitchen, and car parking space.
- மேலும் கற்கலாம்.
- கட்டுரையாளர், பேராசிரியர், தொழில்நுட்ப எழுத்தாளர்.