ஆசிரியர்கள் முன்னுள்ள மிகப்பெரிய சவால் வகுப்பறையில் உள்ள ஒவ்வொரு மாணவரின் வாசிப்புத்திறனுக்கும் ஏற்பப் பாடக்குறிப்புகளைத் தயாரிப்பதுதான். தாமதமாகக் கற்கும் மாணவர்களுக்கு எளிய சொற்களிலும் சராசரி மாணவர்களுக்குத் தகுந்த வாசிப்பு நிலை யிலும் பாடங்களை மாற்றி எழுது வதற்குப் பல மணிநேரம் தேவைப் படும். இதற்கான சிறந்த தீர்வை வழங்குகிறது Diffit என்னும் கல்வி சார்ந்த செய்யறிவுத் தளம்.
பாடப்பகுதி, யூடியூப் காணொளி (YouTube URLs), இணையப் பக்கம், ஆவணம் போன்றவற்றைக் குறுகிய காலத்தில் மாணவர்கள் பயிலும் வகுப்புக்கும் (Grade Level) வாசிப்புத்திறனுக்கும் ஏற்ப இது மாற்றித் தந்துவிடுகிறது.
வகுப்புக்கு ஏற்ற பாடம் (Grade-Level Differentiation): Diffit AI தளத்தில் சிக்கலான அறிவியல் கருத்துகளையோ வரலாற்றுப் பாடங்களையோ கொடுத்து எளிய சொற்களில் மாற்றி அமைத்துக்கொள்ள முடியும். அதன் வழியே அந்தப் பாடத்தை அனைத்து மாணவர்களும் விளங்கிக்கொள்ள வழி பிறக்கிறது.
பயிற்சித்தாள்களும் கேள்விகளும் (Worksheets & Quiz Generation): பாடக்குறிப்புகளை உருவாக்குவதோடு நின்றுவிடாமல், அந்தப் பாடத்தின் சுருக்கம் (Summary), கலைச்சொற்கள் (Vocabulary list with definitions), தெரிவு வினாக்கள் (Multiple Choice Questions) உள்ளிட்டவற்றோடு சிந்தனையைத் தூண்டும் திறந்த வகை வினாக்களையும் (Open-ended Questions) இது தானாகவே படைத்து அளிக்கிறது.
பன்மொழித்திறம் (Multilingualism): ஆங்கிலத்தில் உள்ள பாடப்பகுதிகளைத் தமிழ் உள்பட 50க்கும் மேற்பட்ட மொழிகளில் மொழி பெயர்க்கும் வசதியும் இதில் உள்ளது. இதன் மூலம் தாய்மொழியில் கற்பிக்கும் ஆசிரியர்களுக்கும் மாற்று மொழி கற்போருக்கும் இந்தத் தளம் பெரிதும் உதவுகிறது.
பதிவேற்றுதலும் பிற தளங்களுடனான உறவும் (Export & Integration): Diffit மூலம் உருவாக்கப்படும் பாடப்பயிற்சிகளை நேரடியாக Google Slides, Google Docs, PDF வடிவங்களில் பதிவிறக்கம் செய்துகொள்ளலாம். மேலும், கூகுள் கிளாஸ்ரூம் (Google Classroom) போன்ற தளங்களுடன் நேரடியாக இணைத்து மாணவர்களுக்கு வீட்டுப்பாடமாகக் (Digital Assignments) கொடுத்துவிட முடியும்.
மாணவர்களை மையப்படுத்திய வார்ப்புருக்கள் (Student-Ready Templates): உருவாக்கப்படும் பாடப்பகுதிகளை உரைநடை வடிவில் மட்டும் தராமல் Frayer Model, Graphic Organizers, Venn Diagrams போன்ற கற்பித்தல் வார்ப்புருக்களாகவும் (Templates) மாற்றித்தருவது இதன் இன்னொரு சிறப்பு.
மூல ஆதாரங்களை மாற்றி யமைத்தல் (Primary Source Adaptation): பழமையான ஆவணங்கள், கடிதங்கள், இலக்கியப் பகுதிகளை மூலக்கருத்து சிதையாமல் மாணவர்களின் தற்போதைய புரிதலுக்கு ஏற்ப எளிமைப்படுத்தித் தருவதில் Diffit சிறப்பாகச் செயல்படுகிறது.
பிற செய்யறிவுக் கருவிகளில் இருந்து இது எவ்வாறு வேறுபடுகிறது?
வழக்கமான செய்யறிவுக் கருவி மேலோட்டமான பதில்களை மட்டுமே தரும். ஆசிரியர்கள் அதை வகுப்பறைப் பயன்பாட்டுக்கு ஏற்றவாறு வடிவமைக்க வேண்டியதிருக்கும். மாறாக, Diffit கருவியோ பாடத்திட்டத் தரநிலைகளுக்கு ஏற்ற பாடக்குறிப்புகளையும் அச்சிடத் தகுந்த அழகான பயிற்சித்தாள்களையும் (Printable Activity sheets) வழங்கிவிடுவதால் ஆசிரியர்களுக்குப் பல மணிநேரம் மிச்சமாகிறது.
யாருக்கு இது மிகவும் பயன்படும்?
பள்ளி ஆசிரியர்கள், சிறப்புக் கல்வியாளர்கள் (Special Educators), மொழிப் பயிற்றுநர்கள், கல்வி நிறுவனங்கள். ஆசிரியர்களின் பாடத்தயாரிப்பு நேரத்தைக் கணிசமாகக் குறைத்து, வகுப்பறையில் உள்ள அனைத்து மாணவர்களுக்கும் சமமான கற்றல் வாய்ப்பை வழங்குவதில் Diffit முதன்மை இடத்தைப் பெற்றுள்ளது.
செய்யறிவு விதி
செய்யறிவுக் கருவிகள் தரும் முதல் பதிலோடு திருப்தியடைந்துவிட வேண்டாம். பெற்ற தகவல்களில் சந்தேகம் இருந்தாலோ, மேலதிகத் தகவல் தேவைப்பட்டாலோ தொடர்ந்து கேள்வி கேளுங்கள். அப்படிச் செய்வதன் வழியே மிகச்சரியான பதில்களைப் பெற முடியும்.
எடுத்துக்காட்டாக ஒரு கட்டளை
Create an engaging Class 6 History lesson on the Indus Valley Civilization with simple explanations, real-life examples, vocabulary, multiple-choice questions, critical-thinking activities, group tasks, and an answer key for students.
- மேலும் கற்கலாம்.
- கட்டுரையாளர், பேராசிரியர், தொழில்நுட்ப எழுத்தாளர்.