பள்ளிக்கரணை: திருவண்ணாமலை மாவட்டத்தைச் சேர்ந்த அஜய் (21), சென்னை துரைப்பாக்கத்தில் உள்ள தனியார் விடுதியில் தங்கியிருந்து, அங்குள்ள தனியார் நிறுவனத்தில் வேலை செய்து வருகிறார்.
சொந்த ஊருக்குச் சென்றுவிட்டு, கடந்த 13-ம் தேதி இரவு சென்னைக்குத் திரும்பியுள்ளார். பள்ளிக்கரணை ரேடியல் சாலையில் பைக்கில் சென்றபோது, ஆட்டோவில் வந்த 3 பேர் அவரை வழிமறித்துக்கத்தியைக் காட்டி மிரட்டி பணம் கேட்டுள்ளனர்.
அஜய் ரொக்கப் பணம் இல்லை எனக் கூறியதால், அவரைத் தாக்கி ஆட்டோவில் கடத்திச் சென்றனர். பின்னர் அவரது வங்கிக் கணக்கில் உள்ள பணத்தை எடுத்துக் கொடுக்குமாறு அந்தக் கும்பல் மிரட்டியுள்ளது.
அஜய்யின் வங்கிக் கணக்கில் போதிய பணம் இல்லாததால், கடன் வழங்கும் செயலி மூலம் கடன் பெறச் செய்ததாகக் கூறப்படுகிறது. பின்னர் அந்தத் தொகையிலிருந்து ரூ.9,500-ஐ மற்றொருவரின் வங்கிக் கணக்குக்கு அனுப்பி, ஏடிஎம் அட்டை மூலம் பணத்தை எடுத்துள்ளனர்.
பின்னர் அஜய்யின் செல்போனையும் பறித்துக்கொண்ட கும்பல், அவரை மீண்டும் ஆட்டோவில் அழைத்துவந்து பள்ளிக்கரணை ரேடியல் சாலையில் இறக்கிவிட்டுள்ளது. அவரது பைக்கையும் ஒப்படைத்துவிட்டு தப்பிச் சென்றுள்ளது.
புகாரின் பேரில், பள்ளிக்கரணை போலீஸார் வழக்குப்பதிவு செய்து விசாரித்து வருகின்றனர். சம்பவம் நடைபெற்ற பகுதிகளில் உள்ள கண்காணிப்பு கேமரா பதிவுகளை ஆய்வு செய்து, குற்றவாளிகளை அடையாளம் காணும் முயற்சியில் ஈடுபட்டுள்ளனர்.
பணம் அனுப்பப்பட்ட வங்கிக் கணக்கு, ஏடிஎம் மையங்களில் பணம் எடுக்கப்பட்ட விவரங்கள் குறித்தும் விசாரணை நடைபெற்று வருகிறது. ரேடியல் சாலையில் இரவு நேரக் காவல் ரோந்துப் பணிகளைத் தீவிரப்படுத்த பொதுமக்கள் கோரிக்கை விடுத்துள்ளனர்.