நாகப்பட்டினம்: அம்பாசமுத்திரம் தொகுதி இடைத்தேர்தலில் போட்டியிடப் போவதாக அறிவித்திருக்கும் நாம் தமிழர் கட்சியின் தலைமை ஒருங்கிணைப்பாளர் சீமான், தன்னை பொது வேட்பாளராக அறிவிக்க வேண்டும் என்கிற தொனியில் பேசியிருந்தார். ஆனால், அதற்கு அதிமுக, திமுக கட்சிகள் சார்பில் பெரிதாக எதிர்வினை இல்லாத நிலையில் 5 தொகுதி இடைத்தேர்தலில் தவெகவுக்கு எதிராக பொது வேட்பாளரை நிறுத்துவது சாத்தியம் தானா? என்ற கேள்வி எழுந்துள்ளது.
2026 சட்டப்பேரவைத் தேர்தலில் தவெக பெற்ற 34.92 சதவீத வாக்குகளும், அண்மையில் நடைபெற்ற இடைத்தேர்தலில் 2 தொகுதிகளையும் தவெக கைப்பற்றியதும், தற்போது அக்கட்சியை எதிர்த்து பொது வேட்பாளர் நிறுத்தப்பட வேண்டும் என்கிற யோசனை வருவதற்கு காரணமாக உள்ளது. எனினும் தவெகவுக்கு எதிராக சுமார் 65 சதவீத வாக்குகள் உள்ளதால் தவெக-வை வீழ்த்த மற்ற கட்சிகள் ஒன்றிணைய வேண்டும் என்ற கருத்து முன் வைக்கப்படுகிறது.
கடந்த பொதுத் தேர்தலில் திமுக தனித்து 24.19 சதவீத வாக்குகளையும், கூட்டணியுடன் சேர்த்து 31.40 சதவீத வாக்குகளையும் பெற்றது. அதிமுக தனித்து 21.21 சதவீத வாக்குகளையும், கூட்டணியுடன் சேர்த்து 27.21 சதவீத வாக்குகளையும் பெற்றது. நாதக தனித்துப் போட்டியிட்டு 4.02 சதவீத வாக்குகளைப் பெற்றது. இந்த வாக்குகளை ஒன்றிணைந்தால் தவெகவை எளிதில் வீழ்த்தி விட முடியும் என்பது அரசியல் கணிப்பாளர்களின் கணக்கு.
அதாவது திமுக, அதிமுக தனித்து பெற்ற வாக்குகளுடன் நாதக பெற்ற வாக்குகளையும் இணைத்தால் 49.42 சதவீதம் ஆகிறது. அத்துடன் ஆட்சிக்கு எதிரான அதிருப்தி வாக்குகளையும் சேர்த்தால் சுமார் 55 சதவீத வாக்குகளை பெற்று விடலாம் என்று கணக்கிடப்படுகிறது. இதுவே பொது வேட்பாளர் சிந்தனைக்கு மூலமாக இருக்கிறது. ஆனால் இது நடைமுறையில் சாத்தியமா என்றால், அண்மைக்கால இடைத்தேர்தல் வரலாற்றை பார்த்தால் அதற்கு வாய்ப்பில்லை என்றே சொல்கிறார்கள்.
இதற்கு முன் 2002-ல் நடைபெற்ற ஆண்டிப்பட்டி இடைத்தேர்தலில் ஜெயலலிதாவை எதிர்த்து பொது வேட்பாளர் நிறுத்தப்பட வேண்டும் என்ற கருத்து முன் வைக்கப்பட்டது. ஆனால் அது நடைபெறவில்லை.
2015-ம் ஆண்டு நடைபெற்ற ஆர்.கே.நகர் இடைத்தேர்தலில் ஜெயலலிதாவை எதிர்த்து திமுக போட்டியிடாமல் ஒதுங்கிக் கொண்டதே தவிர, அப்போதும் பொது வேட்பாளர் நிறுத்தப்படவில்லை.
தற்போதைய இடைத்தேர்தலில் திமுகவும், அதிமுகவும் தங்களுக்கான சொந்த செல்வாக்கு எவ்வளவு என்பதை நிலை நிறுத்தவே விரும்புகின்றன.
அது மட்டுமில்லாமல் திமுகவும், அதிமுகவும் கூட்டணி வைத்து தவெக ஆட்சியை கவிழ்க்க முயல்கின்றன என்று தவெக தொடர்ந்து கூறிவரும் நிலையில், பொது வேட்பாளர் நிறுத்தப்பட்டால் அவர்கள் சொல்வது உண்மையாகி விடும் என்கிற நிலையை உருவாக்க அக்கட்சிகள் விரும்பவில்லை. திமுக, அதிமுக கூட்டணி சேர்ந்தால்தான் தவெகவை எதிர்க்க முடியும் என்கிற நிலை உருவாவதையும் இரு கட்சிகளும் விரும்பவில்லை.
ஒருவேளை சீமான் நிபந்தனையின்றி திமுகவை ஆதரித்தால், அவரை அந்த கூட்டணியின் வேட்பாளராக களம் இறக்க வாய்ப்பு உள்ளது. மற்றபடி 5 தொகுதிகளிலும் பொது வேட்பாளர் என்ற நிலைக்கு தற்போது வாய்ப்பில்லை என்கின்றனர் அரசியல் நோக்கர்கள்.