சென்னை: “இன்றைய அரசியல் களம் என்ன, அடுத்தது என்ன என்பது குறித்து எனக்கு மகத்தான வெற்றியை கொடுத்த என் தொகுதி மக்களின் உணர்வுகள், கருத்துக்களை கேட்டறிந்தேன். அவர்களின் கருத்துக்கு ஏற்ப அடுத்தகட்ட நகர்வினை பற்றி முடிவெடுப்பேன்” என அதிமுக முன்னாள் அமைச்சர் சி.விஜயபாஸ்கர் தெரிவித்துள்ளார்.
தமிழக சட்டப்பேரவைத் தேர்தலில் அதிமுக 47 இடங்களில் மட்டுமே வென்று மூன்றாம் இடத்துக்கு தள்ளப்பட்டது. அதைத்தொடர்ந்து பொதுச் செயலாளர் பழனிசாமியுடன் கருத்துவேறுபாடு ஏற்பட்டு சி.வி.சண்முகம் தலைமையில் 25 எம்எல்ஏக்கள் தனி அணியாகச் செயல்பட்டனர்.
அதைத்தொடர்ந்து, இரு அணியினரும் சட்டப்பேரவை அதிமுக தலைவர், கொறடாவைத் தேர்ந்தெடுத்து, பேரவைத் தலைவர் ஜேசிடி பிரபாகரிடம் கடிதம் அளித்திருந்தனர். இதற்கிடையே, சி.வி.சண்முகம் அணியில் இருந்த மரகதம் குமரவேல், சத்யபாமா, ஜெயக்குமார், இசக்கி சுப்பையா ஆகிய 4 எம்எல்ஏக்கள், தங்கள் பதவியை ராஜினாமா செய்துவிட்டு, தவெகவில் இணைந்தனர்.
இந்நிலையில், சி.வி.சண்முகம் அணி எம்எல்ஏக்களான எஸ்.பி.வேலுமணி, சி.விஜயபாஸ்கர், கே.பி.அன்பழகன் உள்ளிட்டோர் பழனிசாமியை சென்னை பசுமைவழிச் சாலையில் நேற்று சந்தித்து சமாதானப் பேச்சுவார்த்தை நடத்தினர். இதில் உடன்பாடு எட்டப்பட்ட நிலையில், இரு அணியினரும் தலைமைச் செயலகம் புறப்பட்டுச் சென்றனர். அங்கு இரு அணிகள் சார்பிலும், தகுதி நீக்க நடவடிக்கை கோரி பேரவைத் தலைவரிடம் ஏற்கெனவே அளித்த கடிதத்தை திரும்பப் பெறுவதாக கடிதம் அளித்தனர்.
மேலும், அதிமுகவின் சட்டப்பேரவை கட்சித் தலைவராக பழனிசாமி, கொறடாவாக அக்ரி கிருஷ்ணமூர்த்தி ஆகியோரை தேர்ந்தெடுத்திருப்பதாகவும் பேரவைத் தலைவரிடம் கடிதம் அளித்தனர். இந்த நிகழ்வில், சி.வி.சண்முகம் உடன் வரவில்லை. அவர் அதிருப்தியில் இருப்பதாகத் தெரிகிறது. அதேபோல சி.விஜயபாஸ்கர், சபாநாயகரை சந்திக்க வந்தபோதும், பழனிசாமியை நேரில் சந்திக்கவில்லை. இதனால் அவரும் அதிருப்தியில் இருப்பதாக சொல்லப்படுகிறது.
இந்த நிலையில், புதுக்கோட்டை விராலிமலையில் உள்ள இல்லத்தில் தனது ஆதரவாளர்களுடன் விஜயபாஸ்கர் இன்று ஆலோசனை நடத்தினார். இதில் அதிமுகவில் தொடரலாமா, தவெகவில் இணையலாமா, அரசியலில் இருந்தே விலகலாமா என்ற 3 விஷயங்களை முன்வைத்து அவர் தன் ஆதரவாளர்களிடம் கருத்துக்களை கேட்டதாகத் தகவல்.
இதனையடுத்து செய்தியாளர்களிடம் பேசிய அவர், “இந்தச் சூழலில் இன்றைய அரசியல் களம் என்ன, அடுத்தது என்ன என்பது குறித்து எனக்கு மகத்தான வெற்றியை கொடுத்த என் தொகுதி மக்களின் உணர்வுகள், கருத்துக்களை கேட்டறிந்தேன். அதுபோல என் வெற்றிக்காக உழைத்த கழக நிர்வாகிகள், மாவட்ட, ஒன்றிய, கிளைக்கழக நிர்வாகிகளிடம் கருத்துகளை கேட்டு வருகிறேன்.
அவர்களின் கருத்துக்கள், எண்ணங்களை, உணர்வுகளை உள்வாங்கிக் கொண்டிருக்கிறேன். அவர்களின் கருத்துக்கு ஏற்ப முடிவெடுப்பேன். என்னை வெற்றிபெற வைத்த தெய்வங்களின் கருத்தை கேட்டுவிட்டு அடுத்தகட்ட நகர்வினை பற்றிக் கூறுவேன்” என்றார்.