சென்னை: யுபிஐ பரிவர்த்தனைக்கு கட்டணம் வசூலிக்கப்படும் என மத்திய அரசு அறிவித்ததை கண்டித்து தமிழ்நாடு வணிகர் சங்கங்களின் பேரமைப்பு மாநில தலைவர் எஸ்.சவுந்தர்ராஜன் தலைமையில் சென்னை எழும்பூர் ராஜரத்தினம் விளையாட்ட ரங்கம் அருகில் ஆர்ப்பாட்டம் நடைபெற்றது.
இதில் அவர் பேசியதாவது: யுபிஐ என்பது டிஜிட்டல் பொருளாதாரத்தின் மையப்புள்ளியாக இன்று மாறியுள்ளது. நாட்டின் மொத்த டிஜிட்டல் பரிவர்த்தனைகளில் 85 சதவீதம் யுபிஐ மூலமாக நடப்பதால், காகித பரிவர்த்தனையை குறைக்கும் நோக்கம், அதன் இலக்கை நெருங்கிவிட்டது. கடந்த 10 ஆண்டுகளில் யுபிஐ-யின் பயன்பாடு விரிவடைந்தது. கட்டணம் எதுவும் இல்லாததால் வணிக நிறுவனங்களும் உள்ளே இழுக்கப்பட்டன.
சிறு, குறு வணிகர்கள் முதல் பெருநிறுவனத்தினர் வரை அதைகையாளத் தொடங்கினர். ஜிஎஸ்டி, உள்ளூர் வரிகள், வாடகை, மின்கட்டணம், ஊழியர்கள் சம்பளம், பெட்ரோல், டீசல் பயன்பாடு, கடன்கள் என வணிகர்கள் பல்வேறு நெருக்கடியில் தவிக்கும் நிலையில் இந்த யுபிஐ பரிவர்த்தனைக் கட்டணம் கூடுதல் சுமையாகும். யுபிஐ பரிவர்த்தனை கட்டணத்தை ஏற்றுக்கொள்ளும் வங்கிகளில் வணிகர்கள் அனைவரும் கணக்கு தொடங்குவோம். இவ்வாறு அவர் பேசினார்.