சென்னை: நட்சத்திர பேச்சாளர்கள் பட்டியலில் இருந்து கூட்டணி கட்சித் தலைவர்களின் பெயர்களை தவெக நீக்கியுள்ளது.
தமிழகத்தில் காலியாக உள்ள மதுராந்தகம், தாராபுரம் ஆகிய இரு சட்டப்பேரவைத் தொகுதிகளுக்கு அக்டோபர் 6-ல் இடைத்தேர்தல் நடக்கிறது. இதற்கான வேட்புமனுத் தாக்கல் நிறைவடைந்து, இறுதி வேட்பாளர்களும் இறுதி செய்யப்பட்டு, அனல் பறக்கும் பிரச்சாரம் நடைபெற்று வருகிறது.
இந்த தேர்தலில் தவெக, திமுக, அதிமுக, நாம் தமிழர், கம்யூனிஸ்ட் கட்சிகள் என 5 முனைப் போட்டி நிலவுகிறது. தேர்தல் பிரச்சாரத்துக்காக கூட்டணி கட்சித் தலைவர்கள் உள்ளிட்ட 40 நட்சத்திர பேச்சாளர்கள் பட்டியலை தவெக வெளியிட்டிருந்தது. இதற்கு திமுக, அதிமுக, பாஜக ஆகிய கட்சிகள் எதிர்ப்பு தெரிவித்தன. பிற கட்சிகளின் தலைவர்கள் எப்படி தவெக நட்சத்திர பேச்சாளர்களாக மாறினர் என கேள்வி எழுப்பி இருந்தனர்.
திமுக அமைப்புச் செயலாளர் ஆர்.எஸ்.பாரதி, பாஜக மாநில செயலாளர் கராத்தே தியாகராஜன் ஆகியோர், தவெகவின் நட்சத்திர பேச்சாளர் பட்டியலை ரத்து செய்ய வேண்டும் என தேர்தல் ஆணையத்தில் புகார் தெரிவித்திருந்தனர். இந்நிலையில், கூட்டணி கட்சித் தலைவர்களான காதர் மொய்தீன், மாணிக்கம் தாகூர், வைகோ, துரை வைகோ, திருமாவளவன், ரவிக்குமார், சிந்தனைச் செல்வன் ஆகியோர் பெயர்களை நட்சத்திர பேச்சாளர்கள் பட்டியலில் இருந்து தவெக நீக்கியுள்ளது.