அமைச்சர் செங்கோட்டையன் | கோப்புப் படம்
ஈரோடு: மகளிர் உரிமைத் தொகையை ரூ.2,500-ஆக உயர்த்தி வழங்குவது குறித்து முதல்வரே முடிவு எடுக்க வேண்டும் என வருவாய்த் துறை அமைச்சர் செங்கோட்டையன் தெரிவித்தார்.
ஈரோடு மாவட்டம் கோபியில் கூட்டுறவு பண்டகசாலை அங்காடி மூலம் ரூ.200 மதிப்பிலான சிறப்பு மளிகைத் தொகுப்பு விற்பனையை அமைச்சர் செங்கோட்டையன் நேற்று தொடங்கி வைத்தார்.
பின்னர் செய்தியாளர்களிடம் அவர் கூறியதாவது: முதல்வர் விஜய், வரும் 3-ம் தேதி (நாளை) பெருந்துறையில் நடைபெற உள்ள நலத்திட்ட உதவிகள் வழங்கும் விழாவில் பங்கேற்கிறார். அப்போது ரூ.1,100 கோடி மதிப்பிலான நலத்திட்ட உதவிகளை வழங்க உள்ளார். மகளிர் உரிமைத் தொகையை ரூ.2,500-ஆக உயர்த்தி வழங்குவது குறித்து முதல்வரே இறுதி முடிவு எடுக்க வேண்டும்.
செங்கல்பட்டில் தமிழக முதல்வர் குறித்து அதிமுக பொதுச்செயலாளர் பழனிசாமி அவதூறான கருத்துகளைத் தெரிவித்துள்ளார். ஒவ்வொருவரும் தங்களுக்கு ஏற்றவாறு கருத்துகளைக் கூறுவது வழக்கம்தான். அவர்களது ஆட்சிக் காலத்தில் என்னென்ன நடைபெற்றன என்பதை எங்களாலும் சுட்டிக்காட்ட முடியும். எதிர்க்கட்சி என்ற முறையில் அரசுக்கு நல்ல ஆலோசனைகளை வழங்க வேண்டுமே தவிர, பல்வேறு கருத்துகளைத் தெரிவிக்கக் கூடாது.
நகராட்சிகள் மற்றும் பேரூராட்சிகளுக்கான பதவிக்காலம் வரும் பிப்ரவரி மாதம் முடிவடைவதால், அதற்குப் பிறகுதான் உள்ளாட்சித் தேர்தல் குறித்து இறுதி முடிவு எடுக்கப்படும்.
நீலகிரி, கொடைக்கானல் பகுதிகளில் பேரிடர் மேலாண்மைத் துறை சார்பில் கண்காணிப்புக் குழுக்கள் அமைக்கப்பட்டு, ஆய்வுப் பணிகள் தீவிரமாக நடைபெற்று வருகின்றன. ஆட்சேபம் இல்லாத புறம்போக்கு நிலங்களில் பட்டா வழங்குவது தொடர்பாக ஈரோடு மாவட்டத்தில் இதுவரை 10 ஆயிரத்துக்கும் மேற்பட்டோரிடம் கணக்கெடுப்புப் பணிகள் மேற்கொள்ளப்பட்டுள்ளன. முதல்வர் உத்தரவிட்டதும் தகுதியுடைய அனைவருக்கும் விரைவாக நிலப்பட்டா வழங்கப்படும் என்றார்.