சவுக்கு மீடியா என்ற யூடியூப் சேனலின் சிஇஓ சங்கர் மீது பல்வேறு காவல் நிலையங்களில் வழக்குகள் பதிவு செய்யப்பட்டன. இது தொடர்பாக கைது செய்யப்பட்ட சங்கர், ஜாமீனில் விடுவிக்கப்பட்டுள்ளார்.
ஆதம்பாக்கம், சைதாப்பேட்டை போலீஸார் பதிவு செய்த வழக்குகளின் அடிப்படையில் கடந்த 13-ம் தேதி கைது செய்யப்பட்ட சங்கர், சிறையில் அடைக்கப்பட்டார். அவரது தாய் கமலா நீதிமன்றத்தில் தாக்கல் செய்த ஆட்கொணர்வு மனுவை விசாரித்த நீதிபதிகள், 12 நிபந்தனைகளுடன், 17 குற்ற வழக்குகள் தொடர்பாக சவுக்கு சங்கருக்கு மார்ச் 25-ம் தேதி வரை இடைக்கால ஜாமின் வழங்கி உத்தரவிட்டனர்.
இந்நிலையில், நேற்று காலை சவுக்கு சங்கர் புழல் சிறையில் இருந்து விடுதலை செய்யப்பட்டார். சிறையில் இருந்து வெளியே வந்த சவுக்கு சங்கரை, அவரது வழக்கறிஞர்கள் மற்றும் ஆதரவாளர்கள் உள்ளிட்டோர் வரவேற்றனர்.