ராமதாஸ்
தமிழகம், புதுச்சேரி சட்டப்பேரவை தேர்தலுக்கான தேர்தல்அறிக்கையை பாமக நிறுவனர் ராமதாஸ் நேற்று வெளியிட்டார். தேர்தல் அறிக்கையில் முதியோருக்கு அரசு பஸ், ரயிலில் இலவச பயணம், மகளிருக்கு உரிமைத் தொகை 3,000 என்று பல்வேறு அறிவிப்புகள் வெளியிடப்பட்டன.
இந்தத் தேர்தலில் சசிகலாவின் புரட்சித் தலைவர் மக்கள் முன்னேற்றக் கழகம் கட்சியுடன் ராமதாஸ் கூட்டணி அமைத்துள்ளார். தேர்தல் அறிக்கையை வெளியிட்ட பின் ராமதாஸ் பேட்டியளித்தார்.
அப்போது அவர் கூறுகையில், “எங்கள் கூட்டணிக்கு வேறு கட்சிகள் வர வாய்ப்பு உள்ளதா என்று கேட்கிறீர்கள். வாய்ப்பு இருக்கும்... இல்லாமலும் போகும். வேட்பாளர் பட்டியல் விரைவில் அறிவிக்கப்படும். எங்கள் கூட்டணிக் கட்சித் தலைவி சசிகலாவுடன் ஆலோசனை நடத்திய பிறகு, அவர்களுக்கு எத்தனை தொகுதிகள், எங்களுக்கு எத்தனை தொகுதிகள் என்ற முடிவுக்கு வருவோம். தொகுதிகள் இறுதி செய்யப்பட்டு வேட்பாளர் பட்டியல் வெளியாகும்” என்றார்.
ராமதாசிடம் செய்தியாளர்கள் உங்கள் கூட்டணியின் முதல்வர் வேட்பாளர் யார்? என்று கேள்வி எழுப்பினர். என்ன சொல்வதென்று சில விநாடிகள் யோசித்த ராமதாஸ், “நீங்களாகக் கூட இருக்கலாம்!” என்று கூறி சிரிப்பலையை ஏற்படுத்தினார்.