சென்னை: தனியார் பள்ளிகளுக்கு அரசு அனுமதி பெற்றுத்தருவதாக கூறி ரூ.100 கோடி மோசடி செய்யப்பட்ட விவகாரத்தில் திமுக பிரமுகர் முத்துகுமார் உறவினர்கள் தொடர்புடைய 4 இடங்களில் போலீஸார் சோதனை நடத்தினர்.
திமுக ஆட்சியின் போது (2021-26) தனியார் பள்ளிகளுக்கு நிரந்தர அங்கீகாரம், பள்ளிகளின் தரம் உயர்வு, டிடிசிபி அனுமதி உள்ளிட்ட பல்வேறு அரசு அனுமதிகளைப் பெற்றுத் தருவதாகக் கூறிப் பணம் வசூலித்து மோசடி செய்யப்பட்டதாகத் தனியார் பள்ளிகள் கூட்டமைப்பின் செயலாளர் இளங்கோவன் சென்னை காவல் ஆணையர் அலுவலகத்தில் புகார் அளித்திருந்தார்.
இந்த வழக்கில், சென்னை சாலிகிராமத்தைச் சேர்ந்தவரும், தமிழ்நாடு தனியார் பள்ளிகள் சங்க கூட்டமைப்பின் தலைவராக இருந்தவருமான திமுக பிரமுகர் பி.டி.அரசகுமார், கடந்த ஜூன் 27-ம் தேதி கைது செய்யப்பட்டார். பின்னர் அவர் குண்டர் தடுப்புச் சட்டத்தின் கீழும் சிறையில் அடைக்கப்பட்டார்.
இவருடன் தொடர்புடைய சுரேஷ், ராஜா ஆகிய மேலும் இருவர் கைது செய்யப்பட்டனர். 177 தனியார் பள்ளிகளிடம் இருந்து புகார்கள் பெறப்பட்டதில், சுமார் ரூ.100 கோடிக்கு மேல் வசூலித்து மோசடி செய்யப்பட்டுள்ளது தெரியவந்தது.
முக்கிய குற்றச்சாட்டுக்குள்ளான அரசகுமார் மற்றும் அவரது குடும்பத்தினரின் 20 வங்கிக் கணக்குகள், தலைமறைவாக உள்ள முன்னாள் அமைச்சர் அன்பில் மகேஸின் நெருங்கிய நண்பரும், திமுக பிரமுகருமான முத்துகுமார் தொடர்புடைய 29 வங்கிக் கணக்குகள் கண்டறியப்பட்டு, அவற்றில் நடைபெற்ற நிதிப் பரிவர்த்தனைகள் குறித்தும் ஆய்வு செய்யப்பட்டது.
அன்பில் மகேஸ் மீது ஊழல் தடுப்புச் சட்டத்தின் கீழும் வழக்குப் பதிவு செய்யப்பட்டது. சென்னை மற்றும் திருச்சியில் உள்ள அவருக்கு சொந்தமான இடங்கள் மற்றும் அவரது உதவியாளர்கள் தொடர்புடைய இடங்கள் என மொத்தம் 9 இடங்களில் போலீஸார் கடந்த 16-ம் தேதி சோதனை நடத்தினர்.
அப்போது, வழக்கு தொடர்பாக 118 ஆவணங்கள், 18 செல்போன்கள், 3 லேப்டாப்கள், 8 பென்டிரைவ்கள், 2 ஹார்டு டிஸ்க்குகள், ஒரு டேப்லெட் மற்றும் ஒரு ஆப்பிள் ஐபேட் ஆகியவை கைப்பற்றப்பட்டன.
கடந்த ஆகஸ்ட் 18-ம் தேதி சென்னை வேப்பேரியில் உள்ள காவல் ஆணையர் அலுவலகத்தில் உள்ள மத்திய குற்றப்பிரிவு போலீஸாரின் அலுவலகத்தில் அன்பில் மகேஸிடம் 8 மணி நேரம் விசாரணை நடத்தப்பட்டது. அப்போது அவர் அளித்த பதில்கள் அனைத்தும் எழுத்து பூர்வமாகவும், வீடியோவாகவும் வாக்குமூலம் பதிவு செய்யப்பட்டது.
இதையடுத்து, அன்பில் மகேஸின் முன்னாள் சிறப்பு உதவியாளராக இருந்த பள்ளிக்கல்வித் துறை இணை இயக்குநர் அருள் முருகன் மற்றும் நண்பரும், உதவியாளருமான திருச்சி மாவட்டம், லால்குடியைச் சேர்ந்த வாளாடி கார்த்திக் ஆகியோரிடமும் போலீஸார் பல கட்ட விசாரணைகளை நடத்தி முடித்துள்ளனர்.
இந்த வழக்கில் அன்பில் மகேஸின் நெருங்கிய நண்பர் முத்துகுமார் துருப்பு சீட்டாக உள்ளார். அவர் தொடர்ந்து தலைமறைவாக உள்ளதால், அவர் வெளிநாடு தப்பிச் செல்வதை தடுக்க அனைத்து விமான நிலையங்களுக்கும் போலீஸார் லுக் அவுட் நோட்டீஸ் பிறப்பித்துள்ளனர்.
இந்நிலையில், முத்துகுமார் சென்னை தி.நகரில் நடத்தி வந்த குளோபல் 360 டிகிரி என்ற நிறுவனத்தில் வைத்து தனியார் பள்ளி நிர்வாகங்களிடம் அரசு அனுமதிகளை பெற்றுத்தருவதாக கூறி பணப்பரிவர்த்தனைகளில் ஈடுபட்டதாகவும், இதில் அவரது உறவினரான சரவணன் என்பவர் உடந்தையாக செயல்பட்டதாகவும் போலீஸ் விசாரணையில் தெரியவந்தது.
இதையடுத்து, முத்துகுமாரின் உறவினர்களான சரவணன் மற்றும் ரமேஷ் ஆகியோரின் வீடுகளில் சோதனை நடத்த சென்னை மத்திய குற்றப்பிரிவு போலீஸார் நடவடிக்கை மேற்கொண்டனர்.
அதன்படி, நேற்று முன்தினம் (26-ம் தேதி) கள்ளக்குறிச்சி மாவட்டம் டி.குண்ணத்தூரில் உள்ள சரவணன் மற்றும் ரமேஷ் ஆகியோரது வீடுகளிலும், கள்ளக்குறிச்சியில் கோகுலகிருஷ்ணன் என்பவரது வீடு மற்றும் கடையிலும் என மொத்தம் 4 இடங்களில் ஒரே நேரத்தில் சோதனை நடத்தப்பட்டது.
நீண்ட நேரம் நடைபெற்ற இந்த சோதனையின்போது, வங்கி பரிவர்த்தனைகள் மற்றும் பணப்பரிமாற்றங்களுடன் தொடர்புடையதாக கருதப்படும் ஆவணங்கள் உள்பட மொத்தம் 30 ஆவணங்கள் கைப்பற்றப்பட்டன.
இந்த ஆவணங்கள் மற்றும் ஏற்கனவே சேகரிக்கப்பட்டுள்ள வங்கி விவரங்கள், காசோலைகள் மற்றும் மின்னணு சாதனங்களை ஆய்வு செய்து போலீஸார் விசாரணையை தீவிரப்படுத்தியுள்ளனர்.