போதையில்லா தமிழகம் என்ற விழிப்புணர்வு சைக்கிள் பேரணியை தாராபுரத்தில் தொடங்கிவைத்து சைக்கிள் ஓட்டிச் சென்ற அமைச்சர்கள் ஆனந்த், அருண்ராஜ், பர்வேஸ் உள்ளிட்டோர்.
தாராபுரம்: தமிழகத்தில் போதைப்பொருள் பயன்பாட்டை முற்றிலும் ஒழிக்கும் வகையிலும், இளைஞர்கள் மற்றும் மாணவர்களிடையே ஆரோக்கியமான வாழ்க்கை முறையை வலியுறுத்தும் நோக்கிலும் தவெக சார்பில் 'போதை இல்லா தமிழகம் உருவாக்குவோம்' என்ற விழிப்புணர்வு சைக்கிள் பேரணி தாராபுரத்தில் தொடங்கி வைக்கப்பட்டது.
இதன் தொடக்க விழாவில், தவெக அமைச்சர்கள் என்.ஆனந்த், அருண் ராஜ் மற்றும் பர்வேஸ் உள்ளிட்டோர் கலந்துகொண்டு கொடியசைத்து சைக்கிள் பேரணியைத் தொடங்கி வைத்து சைக்கிள் ஓட்டினர்.
தாராபுரத்தில் தொடங்கியுள்ள இந்த விழிப்புணர்வு சைக்கிள் பேரணியானது பல்வேறு முக்கியப் பகுதிகள் வழியாகச் சென்று மதுராந்தகம் தொகுதியை அடைகிறது. வழிநெடுகிலும் பொதுமக்களுக்கு போதைப்பொருட்களால் ஏற்படும் தீமைகள் குறித்தும், சமூகப் பாதிப்புகள் குறித்தும் விழிப்புணர்வு துண்டுப் பிரசுரங்கள் வழங்கப்பட்டு பிரச்சாரம் மேற்கொள்ளப்பட இருக்கிறது.
இதுகுறித்து அமைச்சர் அருண்ராஜ் பேசியதாவது: ’ஜனநாயகத்தை போற்றிப் பாதுகாக்கவும், போதையில்லா தமிழகத்தை உருவாக்கவும், பெண்கள் பாதுகாப்பை உறுதிசெய்யவும் பொதுமக்களிடையே ஜனநாயக விழிப்புணர்வை ஏற்படுத்தவும் தமிழக வெற்றிக் கழகத்தின் சார்பில் தாராபுரத்தில் சைக்கிள் பேரணி நடைபெற்றது.
இந்தியாவின் மிகப்பெரிய பெருமையே அதன் ஜனநாயகம் தான். அந்த ஜனநாயகத்தின் மாண்பைப் போற்றிப் பாதுகாக்க வேண்டிய கடமை ஒவ்வொரு குடிமகனுக்கும் உண்டு. கடந்த தேர்தலில் தாராபுரம் தொகுதியில் வெற்றி வாய்ப்பை நாம் இழந்திருந்தாலும், இத்தொகுதி மக்களிடையே அரசியல் மற்றும் ஜனநாயக விழிப்புணர்வை ஏற்படுத்தவும், மாற்றத்துக்கான இந்த புரட்சியில் அவர்களையும் பங்கெடுக்கச் செய்யவும் இந்த சைக்கிள் பேரணி நடத்தப்பட்டது.
இந்த பேரணியானது வெறும் தேர்தலுக்கோ அல்லது வெற்றிக்காகவோ அல்ல; மக்களிடையே ஜனநாயகப் பண்புகளையும் விழிப்புணர்வையும் தொடர்ந்து ஏற்படுத்துவதே இந்த சைக்கிள் பேரணியின் முதன்மை நோக்கம். இவ்வாறு அமைச்சர் அருண்ராஜ் தெரிவித்தார். நிகழ்ச்சியில் ஏராளமான தவெக கட்சித் தொண்டர்கள், இளைஞர்கள் மற்றும் பொதுமக்கள் பெருந்திரளாகக் கலந்து கொண்டு சைக்கிள் ஓட்டி விழிப்புணர்வு ஏற்படுத்தினர்.
