நீட் தேர்வால் தற்கொலை செய்து கொண்ட அனிதாவின் சகோதரர் முன்னெடுக்கும் நீட் ரத்து தொடர்பான கையெழுத்து இயக்கத்தில் ராகுல் காந்தி கையெழுத்திட்டார்.
படம்: எஸ்.சத்தியசீலன்
சென்னை: “பயம், வெறுப்பு மற்றும் பிரிவினையைப் பயன்படுத்தி நாட்டை ஆள பிரதமர் மோடி நினைக்கிறார். கடந்த 15 ஆண்டுகளாக அவர் நடத்தி வந்த நாடகம் இப்போது முடிவுக்கு வந்துவிட்டது” என மக்களவை எதிர்க்கட்சி தலைவர் ராகுல் காந்தி தெரிவித்தார்.
இந்திய கல்வி முறையில் நடைபெறும் முறைகேடுகள், நீட் உள்ளிட்ட தேர்வுத்தாள் கசிவுகள், கல்விக் கட்டண உயர்வு மற்றும் வேலைவாய்ப்பின்மை போன்ற காரணங்களால் பாதிக்கப்பட்டுள்ள மாணவர்களை திரட்டி நாடாளுமன்ற எதிர்க்கட்சி தலைவர் ராகுல் காந்தி ‘மாணவர்களின் குரல்’ என்ற நிகழ்ச்சி வாயிலாக அவர்களுடன் பேசி வருகிறார். அதன்படி சென்னையில் உள்ள தீவுத் திடலில் நேற்று மாணவர்கள் முன்னிலையில் ராகுல் காந்தி பேசினார்.
அப்போது அவர் கூறியதாவது: நான் எப்போது இந்த மண்ணுக்கு வந்தாலும், உங்களிடமிருந்தும் தமிழகத்தின் ஞானத்திலிருந்தும் ஏதேனும் ஒன்றைக் கற்றுக்கொண்டுதான் செல்கிறேன். தமிழ்நாட்டின் மீதும் தமிழ் கலாச்சாரம் மீதும் முழு அளவிலான தாக்குதல் நடத்தப்படுகிறது. புதிய கல்விக் கொள்கை மூலம் தமிழகத்துக்கு வர வேண்டிய ரூ.3,300 கோடியை மத்திய அரசு நிறுத்தி வைத்துள்ளது. நீட் தேர்வு காரணமாக எம்பிபிஎஸ் இடங்களில் தமிழ் வழி மாணவர்களின் பங்கு 87 சதவீதம் வீழ்ச்சியடைந்துள்ளது.
ஆளுநர் மூலம் ஆர்எஸ்எஸ் ஆட்களைப் பல்கலைக்கழகங்களில் திணிப்பதால், 70 சதவீத மாநிலப் பல்கலைக்கழகங்கள் துணைவேந்தர்கள் இல்லாமல் இயங்குகின்றன. மத்திய அமைச்சர் அமித் ஷா தமிழ்மொழி இரண்டாம் பட்சம் என்று வெளிப்படையாகக் கூறுகிறார். தொகுதி மறுவரையறை மூலம் தமிழகத்தின் குரலை ஒடுக்க நினைக்கிறார்கள். இதையெல்லாம் நாங்கள் ஒருபோதும் அனுமதிக்க மாட்டோம்.
மொழி திணிப்பில் தமிழகத்துக்கு கல்விக்கான ரூ.3,300 கோடி நிதி நிறுத்தி வைத்திருக்கிறார்கள். 70 சதவிகித பல்கலைகழகங்களில் துணைவேந்தர்கள் இல்லை. இதை நிறுத்தி வைத்துள்ள தமிழ்நாடு ஆளுநர், உங்கள் கல்வி நிலையங்களில் ஆர்எஸ்எஸ் அமைப்பினரை அமர்த்தி அவர்கள் நிர்வாகிக்க வேண்டும் என விரும்புகிறார். தொகுதி மறுவரையறையில் தமிழ்நாட்டின் எம்பிக்கள் எண்ணிக்கையை நாடாளுமன்றத்தில் குறைக்கவும் விரும்புகின்றனர். ஆனால், இவர்களால் தமிழ்நாட்டை தொடக்கூட முடியாது.
பயம், வெறுப்பு மற்றும் பிரிவினையைப் பயன்படுத்தி நாட்டை ஆள பிரதமர் மோடி நினைக்கிறார். கடந்த 15 ஆண்டுகளாக அவர் நடத்தி வந்த நாடகம் இப்போது முடிவுக்கு வந்துவிட்டது. எதிர்க்கட்சிகள் அவரைச் சூழ்ந்து கொண்டுள்ளன. தேசத்துக்கு எதிராக அவர் செய்த குற்றங்களுக்கு அவர் சட்டத்தின் முன் நிறுத்தப்படுவது உறுதி.
மோடி எவ்வளவு பெரிய சக்தி வாய்ந்தவராக இருந்தாலும், மாணவர்களின் குரலையும் இந்த நாட்டின் ஆன்மாவையும் யாராலும் ஒடுக்க முடியாது. மாணவர்களே, நீங்கள் பயப்படத் தேவையில்லை; நாங்கள் உங்களுடன் இருக்கிறோம். உங்கள் எதிர்காலத்தைப் பாதுகாத்துக் கொள்ளுங்கள், எதையும் கேள்விகளுக்கேற்ப ஆராய்ந்து தெரிந்து கொள்ளுங்கள். ஒன்றாக இணைந்து நாம் மோடியைத் தகர்ப்போம். இவ்வாறு அவர் பேசினார்.
தொடர்ந்து மாணவர் இந்திரப்பிரியன் பேசுகையில், “பெரியாரை வெறும் நாத்திகராகப் பார்க்காமல் சமூக நீதி மற்றும் பெண் விடுதலைக்காகப் போராடிய தலைவராக அனைவரும் வாசிக்க வேண்டும்” என்றார்.
அப்போது குறுக்கிட்ட ராகுல் காந்தி, “எங்குமே கேள்வி கேட்கக் கூடாது, எல்லாவற்றையும் குருட்டுத்தனமாக நம்ப வேண்டும் என்று சொல்பவர்களிடம் பெரியார் என்ன சொல்லியிருப்பார்? மோடியிடம் பெரியார் என்ன சொல்லியிருப்பார்?” என்ற கேள்விகளை கேட்டார். அதற்கு இந்திரப்பிரியன், “ஆணாதிக்கம், மதம் மற்றும் சாதிய ஆணவத்தை எதிர்த்து மனிதநேயத்தையே முதன்மையாகப் பேண வேண்டும் என்று பெரியார் மோடியிடம் சொல்லியிருப்பார்” என்றார்.
பாலவாக்கத்தில் உள்ள உணவகத்தில் முதல்வர் விஜய் உடன் தேநீர் அருந்திய ராகுல்காந்தி.
முதல்வர் விஜய் அளித்த விருந்து
‘மாணவர்கள் குரல்’ நிகழ்ச்சியில் கலந்து கொண்டு பேசுவதற்காக ராகுல் காந்தி நேற்று சென்னை வந்தார். விமான நிலையத்தில் இருந்து காரில் நேரடியாக நீலாங்கரையில் உள்ள முதல்வர் விஜய் வீட்டுக்கு ராகுல் சென்றார். அவரை வாசலில் சென்று வரவேற்ற முதல்வர் விஜய் தனது இல்லத்தில் மதிய உணவு விருந்து அளித்தார்.
இதன் பின்னர் தற்போதைய அரசியல் சூழல் மற்றும் அடுத்தக்கட்ட நகர்வுகள் தொடர்பாக இருவரும் கட்சி நிர்வாகிகள் இல்லாமல் தனியாக சுமார் ஒரு மணி நேரம் ஆலோசனை நடத்தியதாகக் கூறப்படுகிறது. குறிப்பாக பிரதமர் வேட்பாளர் தொடர்பாக தவெகவுக்கும் காங்கிரஸுக்கும் இடையே ஒரு சிறிய சலசலப்பு தொடர்ந்து நிலவி வருகிறது.
இதற்கு முற்றுப்புள்ளி வைக்கும் விதமாக இந்த சந்திப்பு நிகழ்ந்துள்ளதாக அரசியல் வட்டாரங்களில் பேசப்படுகிறது. மேலும், மதுராந்தகம் மற்றும் தாராபுரம் இடைத்தேர்தலில் வெற்றி பெற்றமைக்காக முதல்வர் விஜய்க்கு ராகுல் தனது வாழ்த்துகளை கூறியதாகவும் தகவல்கள் வெளியாகி உள்ளன. இந்த சந்திப்புக்கு பின்னர் இருவரும் ஒரே காரில் பயணம் செய்தனர். தொடர்ந்து பாலவாக்கத்தில் உள்ள பிரபல கிரிக்கெட் வீரர் தோனிக்கு சொந்தமான 7 படல் கஃபே உணவகத்துக்குச் சென்று இருவரும் தேநீர் அருந்தினர்.