முதன்மையானவரின் அண்டை தேச பயணத்தின்போது அங்கே சில பல ரகசியச் சந்திப்புகளையும் நிகழ்த்தினாராம். அதில் முக்கியமானவர், இப்போது தனி இயக்கம் நடத்தும் தாமரைக் கட்சியின் முன்னாள் முக்கிய நிர்வாகியாம். சுமார் ஒரு மணி நேரத்துக்கும் மேலாக நடந்த இந்தச் சந்திப்பில், தமிழக அரசியல் நிலவரம் குறித்து இருவரும் தீவிரமாக விவாதித்தார்களாம்.
ஆட்சி அமைப்பதில் சிக்கலான சூழல் ஏற்பட்டபோது முன்னாள் தாமரைக் கட்சி நிர்வாகியும் தன்னால் முடிந்த சில லீடுகளை முதன்மையானவருக்கு எடுத்துக் கொடுத்தாராம். அதற்கு நன்றி தெரிவித்தவர், தொடர்ந்து தனக்கு பக்கபலமாக இருக்க வேண்டும் எனக் கேட்டுக் கொண்டாராம்.
அரசுடன் தொழில் முதலீட்டு ஒப்பந்தம் போட்டிருக்கும் நிறுவனங்களில் ஒன்று முன்னாள் தாமரைக் கட்சி நிர்வாகியின் சிபாரிசிலேயே உள்ளுக்குள் வந்ததாகவும் ஒரு கொசுறுத் தகவல் சொல்கிறார்கள்.