சென்னை: ‘எனது ஆதங்கத்தின் வெளிப்பாட்டைதான் எக்ஸ்தளத்தில் பதிவு செய்தேன். தவெகவில் இருந்து நான் விலகவில்லை’ என தவெக பரப்புரை செயலாளர் நாஞ்சில் சம்பத் தெரிவித்துள்ளார்.
தமிழக வெற்றிக் கழகத்தில் கடந்த டிசம்பரில் இணைந்த நாஞ்சில் சம்பத்துக்கு, கட்சியின்பரப்புரைச் செயலாளர் பொறுப்பு வழங்கப்பட்டது. இந்நிலையில் நேற்று முன்தினம், ‘போனால் போகட்டும் போடா இந்த பூமியில் நிலையாய் வாழ்ந்தவர் யாரடா. என்னுடைய பகலை யாரும் இருட்டாக்க முடியாது.
என்னுடைய வெளிச்சத்தை யாரும் அணைக்கமுடியாது. என்னுடைய காற்றை யாரும் வழிமறிக்க முடியாது’ என எக்ஸ்தளப் பக்கத்தில் அவர் பதிவிட்டது பரபரப்பை ஏற்படுத்தியது. அதைத் தொடர்ந்து, தவெக மீது நாஞ்சில் சம்பத் அதிருப்தியில் இருப்பதாகவும், அவர் நடிகர் தனுஷுடன் இணைய உள்ளதாகவும் தகவல்கள் பரவின.
இதுகுறித்து ‘இந்து தமிழ் திசை’ செய்தியாளரிடம் நாஞ்சில் சம்பத் கூறியதாவது: தவெக நட்சத்திர பட்டியலில் எனது பெயர் இடம்பெறவில்லை. தவெகவின் பரப்புரை செயலாளரான எனக்கு வாய்ப்பு தரப்படவில்லை. அந்தக் கவலை, ஆற்றாமை, ஆதங்கத்தை எனது பதிவின் மூலம் வெளிப்படுத்தினேன்.
எனது பதிவு தலைமைக்கு சொன்னதுதான். நடிகர் தனுஷுடன் இணைய இருப்பதாக வலைதளங்களில் செய்தி வருகிறது. அதுபோன்ற முட்டாள்தனமான முடிவை எடுக்கமாட்டேன். தவெகவில்தான் இருக்கிறேன். அங்கிருந்து விலகவில்லை என்றார்.