தாராபுரம் தொகுதி மூலனூரில் அதிமுக வேட்பாளர் பானுமதிக்கு ஆதரவாக நேற்று பிரச்சாரம் செய்த பாஜக மாநிலத் தலைவர் நயினார் நாகேந்திரன்.
தாராபுரம்: தமிழகத்தில் வெறும் ரீல்ஸ் ஆட்சிதான் நடக்கிறது. இடைத்தேர்தலுக்கு பின்னர் ஆட்சி மாற்றம் ஏற்படும் என்று தாராபுரம் பிரச்சாரத்தில் தமிழக பாஜக தலைவர் நயினார் நாகேந்திரன் தெரிவித்தார்.
தாராபுரம் தொகுதி அதிமுக வேட்பாளர் பானுமதிக்கு ஆதரவாக மூலனூரில் நயினார் நாகேந்திரன் நேற்று இரவு பிரச்சாரம் செய்தார். அப்போது அவர் பேசியதாவது: தாராபுரம் தொகுதியில் கிராமங்கள் அதிகமாக இருந்தாலும் இங்குள்ள மக்கள் அரசியல் விழிப்புணர்வு உள்ளவர்கள். தவெக வேட்பாளர் சத்யபாமா மேடையில் அழுகிறார். அவரை விஜய் தேற்றுகிறார். அவர் அழ வேண்டிய அவசியம் என்ன? மக்களின் கட்சியான அதிமுகவுக்கு தாராபுரம் தொகுதியில் வெற்றியை தேடித்தர வேண்டும்.
தமிழகத்தில் தற்போது வெறும் ரீல்ஸ் ஆட்சிதான் நடைபெறுகிறது. கடந்த தேர்தலில் 5, 6 இடத்தில் மட்டுமே பேசிய விஜய், நாளைக்கு 39 இடத்தில் பேசவுள்ளார் என்றால் ஆட்சி மாற்றத்துக்கான அறிகுறிதான் தாராபுரம் இடைத்தேர்தல். இதற்கு சத்யபாமாவுக்குத்தான் நன்றி சொல்ல வேண்டும்.
முதல்வர் வீட்டில் இருந்து வெறும் 7 கி.மீ. தொலைவில் உள்ள நிறுவனத்துக்காக விஜய் லண்டனுக்கு சென்று தொழில் முதலீட்டை ஈர்க்கிறார் என்று சொன்னால் மக்களை அவர் எவ்வளவு முட்டாள்களாக நினைக்கிறார்.
தமிழகத்தில் ஊழல் அதிகமாக உள்ளது என்று அவர்களுக்கு ஆதரவு கொடுத்த மார்க்சிஸ்ட் மாநிலச் செயலாளர் சண்முகமே சொல்லியுள்ளார். ஆகவே, இடைத்தேர்தலுக்கு பின்னர் ஆட்சி மாற்றம் ஏற்படும். இவ்வாறு அவர் பேசினார்.