சென்னை: ‘சாத்தியக்கூறு உள்ள இடம் குறித்து ஆய்வு செய்து, சென்னைக்குள் புதிய தலைமைச் செயலகம் அமைக்கப்படும்’ என மின்சாரம் மற்றும் சட்டத்துறை அமைச்சர் நிர்மல்குமார் தெரிவித்துள்ளார்.
தமிழ்நாடு டாக்டர் அம்பேத்கர் சட்டப் பல்கலைக்கழகம் சார்பில் மாநில அளவிலான சட்டக் கல்லூரிகளுக்கு இடையிலான தடகளப் போட்டியை சென்னை நேரு விளையாட்டு அரங்கில் மின்சாரம் மற்றும் சட்டத்துறை அமைச்சர் நிர்மல் குமார் நேற்று தொடங்கி வைத்தார்.
இந்நிகழ்ச்சியில் பல்கலை துணைவேந்தர் குழுத் தலைவர் நீதியரசர் பாரதிதாசன் உள்ளிட்ட பலர் கலந்து கொண்டனர். முன்னதாக அனைத்து மாவட்டங்களைச் சேர்ந்த கல்லூரி மாணவர்களின் அணிவகுப்பு நடைபெற்றது.
இந்நிகழ்ச்சிக்கு பிறகு செய்தியாளர்களிடம் அமைச்சர் கூறியதாவது: சட்டக் கல்லூரிகள் மற்றும் பல்கலைக்கழகங்களில் நீண்டகாலமாக பட்டமளிப்பு விழாக்கள் நடைபெறாமல் உள்ளன.
கல்வியின் தரத்தை உயர்த்தவும், பல்கலைக்கழகங்களை சிறப்பாக செயல்படுத்தவும் நடவடிக்கை எடுத்து வருகிறோம். அதேபோல், துணைவேந்தரை நியமனம் செய்யும் அதிகாரம் மாநில அரசிடம் இல்லாத நிலையில், அதற்கான சட்டரீதியான நடவடிக்கையை எடுக்க உள்ளோம்.
புதிய தலைமைச்செயலகம் வேண்டும் என்பது 40 வருட கோரிக்கையாகும். அதற்காக மீனவர்களுக்கு பாதிப்பை ஏற்படுத்தும் வகையில் அரசு முடிவு எடுக்காது. சென்னையில்தான் அனைத்து துறைசார்ந்த தலைமையகங்கள் உள்ளன. நகரத்துக்கு வெளியே 40 கி.மீ தொலைவில் அமைக்க முடியாது.
சென்னைக்குள் சாத்தியக்கூறு இருக்கும் இடங்களில் புதிய தலைமைசெயலகத்தை அமைப்பது குறித்து ஆய்வு மேற்கொள்ளப்படும். முன்னாள் அமைச்சர் செந்தில்பாலாஜி உட்பட பலர் மீது நடவடிக்கை எடுக்க ஆளுநருக்கு கடிதம் அனுப்பப்பட்டு இதுவரை ஒப்புதல் வழங்கப்படாதது ஆச்சரியமளிக்கிறது.
இதில், திமுகவைக் காப்பாற்ற பாஜக மறைமுகமாக செயல்படுகிறதா என்பது தெரியவில்லை. இடைத்தேர்தலில் தவெகவுக்கு எந்த பின்னடைவும் இல்லை. தனது சுயநலத்தால் அதிமுகவை பழனிசாமி அழித்துவிட்டார்.
அவரது தலைமை மீதான அதிருப்தியில் வெளியே வந்த வேட்பாளர்கள் நிச்சயம் வெற்றி பெறுவார்கள். மதுரை மீனாட்சியம்மன் கோயில் அறங்காவலர் விவகாரத்துக்கும் எனக்கும் சம்பந்தமில்லை.
கோயில் விவகாரத்தில் என்னுடைய தலையீடு ஏதுமில்லை. முன்னாள் அமைச்சர் பி.டி.ஆர்.பழனிவேல் தியாகராஜனின் தாயாருக்கு உரிய மரியாதை செய்து அவரை அழைத்து அமர வைத்து அனைத்தையும் செய்து கொடுத்தோம். தனிப்பட்ட ஈகோவால் பழனிவேல் தியாகராஜன் குற்றம்சாட்டுகிறார். இவ்வாறு அமைச்சர் கூறினார்.