தூத்துக்குடி: மேகேதாட்டு அணை கட்டுவதற்கு ஒரு செங்கலைக் கூட வைக்க முதல்வர் அனுமதிக்க மாட்டார். அணை கட்டும் முயற்சியில் கர்நாடக அரசு ஈடுபட்டால் மிகப்பெரிய விளைவுகளை சந்திக்க நேரிடும் என்று தமிழக எரிசக்தி மற்றும் சட்டத்துறை அமைச்சர் சி.டி.ஆர்.நிர்மல் குமார் தெரிவித்தார்.
தூத்துக்குடி அனல்மின் நிலையத்தில் கடந்த ஆண்டு ஏற்பட்ட தீ விபத்தில் சேதமடைந்த 1-வது அலகில் சீரமைப்புப் பணிகள் முடிந்ததை தொடர்ந்து சோதனை ஓட்டத்தை அமைச்சர் தொடங்கி வைத்தார். பின்னர் செய்தியாளர்களிடம் அவர் கூறியதாவது:
மேகேதாட்டு அணை விவகாரத்தில் தமிழக அரசின் நிலைப்பாடு மிகவும் தெளிவாக உள்ளது. எந்தச் சூழ்நிலையிலும் மேகேதாட்டு அணை கட்டுவதற்கு ஒரு செங்கல்கூட வைக்க தமிழக முதல்வர் அனுமதிக்க மாட்டார். கர்நாடக அரசு என்ன முயற்சி மேற்கொண்டாலும், அதை எதிர்த்து தமிழக அரசு கடுமையான எதிர்வினையாற்றும்.
இந்த விவகாரம் தொடர்பாக பசுமைத் தீர்ப்பாயம் உள்ளிட்ட உரிய சட்ட அமைப்புகளிடமும், உச்ச நீதிமன்றத்திலும் தமிழக அரசு முறையிட்டுள்ளது.
மேகேதாட்டுவில் தமிழகத்தை மீறி ஒரு செங்கல்கூட வைக்க முடியாது. அத்தகைய முயற்சியில் கர்நாடக அரசு ஈடுபட்டால் மிகப்பெரிய விளைவுகளைச் சந்திக்க நேரிடும்.
புதுப்பிக்கத்தக்க எரிசக்தித் துறையில் கடந்த 6 மாதங்களாக பேட்டரி மின்சேமிப்புக் கொள்கையை உருவாக்கும் பணிகள் மேற்கொள்ளப்பட்டன. இதுவரை 1,000 மெகாவாட்டுக்கும் அதிகமான மின்சேமிப்புத் திட்டங்களுக்கான விண்ணப்பங்கள் வந்துள்ளன. அவற்றைச் சரிபார்த்து அனுமதி வழங்குவதற்கான பணிகள் நடைபெற்று வருகின்றன. பகல் நேரங்களில் சூரிய மின்சக்தி மூலம் கிடைக்கும் உபரி மின்சாரத்தை பேட்டரிகளில் சேமித்து இரவு நேரங்களில் மின்தேவை அதிகரிக்கும்போது பயன்படுத்துவதே இதன் நோக்கமாகும். 2029-ம் ஆண்டுக்குள் 10 ஜிகாவாட் அளவிலான பேட்டரி மின்சேமிப்பு வசதியை உருவாக்க இலக்கு நிர்ணயித்துள்ளோம்.
மாநிலத்தின் எதிர்கால மின்தேவையை கருத்தில் கொண்டு புதிய மின் கொள்முதல் கொள்கை உருவாக்கப்பட்டுள்ளது. இதன் ஒரு பகுதியாக நடுத்தர கால மின் கொள்முதல் ஒப்பந்தங்களுக்கான ஒப்பந்தப்புள்ளிகள் கோரப்பட்டுள்ளன.இவ்வாறு அமைச்சர் கூறினார்.