தமிழக காங்கிரஸ் தலைவர் மாணிக்கம் தாகூர்
திண்டுக்கல்: புத்தக கொள்முதல் ஊழல் குறித்து உதயநிதி ஸ்டாலினிடம் கட்டாயம் விசாரணை நடத்த வேண்டும் என்று தமிழக காங்கிரஸ் தலைவர் மாணிக்கம் தாகூர் கூறியுள்ளார்.
மதுரை, திண்டுக்கல், தேனி மாவட்ட காங்கிரஸ் சார்பில் மண்டல நிர்வாகிகள், ஒருங்கிணைப்பாளர்கள் பயிற்சி முகாம் திண்டுக்கல்லில் நேற்று நடைபெற்றது. காங்கிரஸ் ஒருங்கிணைப்பு கமிட்டி தலைவர் பீட்டர் அல்போன்ஸ் முகாமை தொடங்கி வைத்தார். அமைச்சர் விஸ்வநாதன், தமிழக காங்கிரஸ் தலைவர் மாணிக்கம் தாகூர் உள்ளிட்டோர் கலந்துகொண்டார்.
பின்னர், செய்தியாளர்களிடம் மாணிக்கம் தாகூர் கூறியதாவது: தவெக அரசு மீது நம்பிக்கை இல்லா தீர்மானம் கொண்டு வரப்பட்டாலும் அது தோற்கடிக்கப்படும். எப்போதுமே முதல்வர் விஜய்யுடன் காங்கிரஸ் கட்சி துணை நிற்கும்.
பாஜக மேலிடப் பொறுப்பாளராக தமிழகத்துக்கு நியமிக்கப்பட்டிருக்கும் ராம்மாதவ், ஆர்எஸ்எஸ் அமைப்பின் முக்கிய நிர்வாகி, தமிழகத்தை மத ரீதியாகப் பிரிக்க வேண்டும் என்ற ‘அஜெண்டாவுடன்’ அவர் அனுப்பி வைக்கப்பட்டுள்ளார். தமிழகத்தைப் பிரிக்கும் இந்த சதித் திட்டத்துக்கு பழனிசாமி தலைமையிலான அதிமுக துணை போகிறது.
இதனால்தான் மக்களிடம் பழனிசாமி மீதான நம்பிக்கை குறைந்து, அவர்களுடன் இருப்பவர்களே அவரை விட்டு ஒதுங்கிச் செல்கிறார்கள். சிறப்புத் திட்டங்களின் துறை அமைச்சராக இருந்த உதயநிதியிடம், புத்தக கொள்முதல் ஊழல் குறித்து காவல்துறையும், ஊழல் தடுப்புத் துறையும் கட்டாயம் விசாரணை நடத்த வேண்டும். இவ்வாறு அவர் கூறினார்.