மதுரை: ஆதிதிராவிடர் மாணவர்கள் நலநிதியில் ஊழல் செய்வதற்கு பதிலாக தெருத் தெருவாக பிச்சை எடுக்கலாம் என உயர் நீதிமன்ற கிளை நீதிபதிகள் காட்டமாக தெரிவித்துள்ளனர்.
சிவகங்கை மாவட்டம் பாத்திரக்குடியைச் சேர்ந்த சக்திவேல் என்பவர் தாக்கல் செய்த மனுவில், ‘சிவகங்கை மாவட்டத்தில் ஆதிதிராவிட விடுதி மாணவர்களுக்காக ஒதுக்கப்பட்ட 2 கோடி 35 லட்சம் நிதியில் பெரும் மோசடி நடந்துள்ளது. 2017 முதல் 2023 வரை அரசு ஒதுக்கிய தொகை மாணவர்களின் கணக்கில் செலுத்தப்படாமல் வட்டாட்சியர் உள்ளிட்ட அதிகாரிகளால் மோசடி செய்யப்பட்டுள்ளது.
இது குறித்து வருவாய் துறை மற்றும் காவல்துறையிடம் புகார் அளிக்கப்பட்ட நிலையில், இந்த முறைகேட்டில் ஈடுபட்டதாக கூறப்படும் தாசில்தார்களில் பலர் மீது முறையான நடவடிக்கை எடுக்கப்படவில்லை. இந்த வழக்கு விசாரணையை சிபிசிஐடி விசாரணைக்கு மாற்றி உத்தரவிட வேண்டும்’ என்று மனுவில் கூறியிருந்தார்.
இந்த மனு நீதிபதிகள் வேல்முருகன், ராமகிருஷ்ணன் அமர்வில் இன்று விசாரணைக்கு வந்தது. அப்போது, அரசு தரப்பில் கூடுதல் தலைமை வழக்கறிஞர் ஆஜராகி, “அதிகாரிகள் நியமிக்கப்பட்டு விசாரணை நடைபெற்று வருகிறது. குற்றப்பத்திரிகை விசாரணை நீதிமன்றத்தில் தாக்கல் செய்யப்பட்டுள்ளது” எனத் தெரிவித்தார்.
அப்போது குறிக்கிட்ட நீதிபதிகள், “எப்போது ஊழல் செய்ததற்கு எப்போது குற்றப்பத்திரிகை தாக்கல் செய்துள்ளீர்கள்?” என கேள்வி எழுப்பினர்.
மேலும், “ஆதிதிராவிடர் மாணவர்களுக்கு வழங்கக்கூடிய பணத்தில் ஊழல் செய்வதற்கு பதில் தெருத் தெருவாக பிச்சை எடுக்கலாம், இந்தப் பிழைப்பு, அதிகாரிகளுக்கு தேவையா? இதுபோன்றவர்களை ஏன் பணியில் வைத்துள்ளீர்கள்?
ஊழல் செய்தவருக்கு மக்கள் வரி பணத்தில் அரசு வழக்கறிஞர்கள் ஆஜராகி ஆதரவாக பேசுகிறீர்கள். இது போன்ற ஆட்களை வைத்துதான் அரசு நடத்தபட்டு வருகிறது” என்றனர்.
மேலும், அரசு தரப்பு வழக்கறிஞர், நாங்கள் 3 மாத குழந்தை (அரசு), கொஞ்சம் பொருத்திருந்து பாருங்கள்” என்றனர்.
அதற்கு நீதிபதிகள், “ஆட்சி மாறலாம், ஆனால் அரசு அதிகாரிகள் அப்படியேதானே இருக்கிறார்கள். 99 சதவீத அதிகாரிகள் ஊழல் செய்பவர்களாகத்தான் இருக்கிறார்கள். இங்கே நாங்கள் எந்த அரசையும் குறை கூறவில்லை. எந்த அரசு வந்தாலும் ஊழல் அதிகாரிகளை தான் பாதுகாக்க முயற்சிக்கிறது. படித்து முடித்தவுடன் இந்த துறைதான் வேண்டும் என்று வருபவர்களை என்ன செய்ய முடியும், பணம் கொடுத்து வந்தால் ஊழல் செய்ய தான் செய்வார்கள்” என்றனர்.
பின்னர் நீதிபதிகள், “தமிழகத்தில் அனைத்து அரசு துறைகளில் ஊழல் செய்த அதிகாரிகள் எத்தனை பேர்? அவர்கள் மீது என்ன நடவடிக்கை எடுக்கபட்டுள்ளது? எத்தனை வழக்குப் பதிவு செய்யப்பட்டுள்ளது, அந்த வழக்குகளின் நிலை என்ன? எத்தனை வழக்குகளில் விசாரனை அதிகாரிகள் நியமனம் செய்யபட்டுள்ளது என்பது குறித்து தமிழக அரசு தரப்பில் விரிவான பதில் மனு தாக்கல் செய்ய வேண்டும்” என உத்தரவிட்டு விசாரணையை நான்கு வாரத்துக்கு ஒத்திவைத்தனர்.