கிருஷ்ணசாமி
கோவை: அரசு மாணவர் விடுதிகளில் மாட்டிறைச்சி உணவு வழங்கப்படும் என்ற அமைச்சரின் பேச்சை கண்டித்து வரும் 30-ம் தேதி தமிழகம் முழுவதும் ஆர்ப்பாட்டம் நடத்தப்படும் என புதிய தமிழகம் கட்சித் தலைவர் க.கிருஷ்ணசாமி அறிவித்துள்ளார்.
கோவையில் நேற்று செய்தியாளர்களிடம் அவர் தெரிவித்ததாவது: தமிழகத்தில் அரசு மாணவர் விடுதிகளில் வழங்கப்படும் உணவு சரிவர வேகாமல், அரைவேக்காடாக இருப்பதாகப் புகார்கள் வருகின்றன. விடுதிகளில் நிலவும் அடிப்படை அவலங்களை சரிசெய்ய வேண்டிய பொறுப்பில் உள்ளவர்கள், அங்கு மாட்டிறைச்சி உணவு வழங்கப்படும் என பேசிவருவது எந்த விதத்திலும் ஏற்கத்தக்கதல்ல.
அரசு பணத்தில் மாணவர்களுக்கு மாட்டிறைச்சி உணவை வலிந்து திணிக்க முயற்சிப்பது, ஒட்டுமொத்த மக்களின் உணர்வுகளைப் புண்படுத்தும் செயலாகும். தனிப்பட்ட உணவுப் பழக்கங்களை மாணவர்கள் மீது திணிக்கும் போக்கை உடனடியாக கைவிட வேண்டும்.
சர்ச்சைக்குரிய வகையில் பேசிய அமைச்சர் வன்னியரசு பகிரங்க மாக மன்னிப்புக் கேட்டு, கருத்தை திரும்பப் பெற வேண்டும். அமைச்சரின் பேச்சை கண்டித்து வரும் 30-ம் தேதி தமிழகத்தின் அனைத்து மாவட்ட ஆட்சியர் அலுவலகங்கள்முன்பும், அமைச்சரின் வீட்டின் முன்பும் புதிய தமிழகம் கட்சியின் சார்பில் ஆர்ப்பாட்டம் நடைபெறும்.
எந்தவொரு நியாயமான முகாந்திரமும் இன்றி, தேர்ந்தெடுக்கப்பட்ட குறுகிய காலத்திலேயே சுயநல ஆதாயங்களுக்காகப் பதவியை ராஜினாமா செய்துவிட்டுத் திணிக்கப்படும் இந்த இடைத்தேர்தல் அர்த்தமற்றது. இது ஜனநாயகத்துக்கு எதிரான தவறான முன்னுதாரணம்.
கொங்கு இளைஞர் பேரவை, புரட்சி பாரதம் உள்ளிட்ட 15-க்கும் மேற்பட்ட அமைப்புகள் அங்கம் வகிக்கும் அனைத்துக் கட்சிக் கூட்டமைப்பு, இந்த இடைத்தேர்தலில் போட்டியிடவோ அல்லது யாருக்கும் ஆதரவு அளிக்கவோ போவதில்லை. இவ்வாறு தெரிவித்தார்.