சென்னை: தீபாவளி பண்டிகை கொண்டாட்டம் காரணமாக கோயம்பேடு காய்கறி சந்தைக்கு நாளை (நவ.9) விடுமுறை விடப்பட்டுள்ளது.
கோயம்பேடு சந்தையில் 1200-க்கும் மேற்பட்ட காய்கறி கடைகள் இயங்கி வருகின்றன. இந்த கடைகளுக்குத் தினமும் சுமார் 3 ஆயிரம் டன்னுக்கு மேற்பட்ட காய்கறிகள் விற்பனைக்காக கொண்டு வரப்படுகின்றன. இந்த கடைகளில் சுமார் 5 ஆயிரத்துக்கும் மேற்பட்ட தொழிலாளர்கள் வேலை செய்கின்றனர்.
விவசாயிகள் தீபாவளி பண்டிகை கொண்டாடட்டத்தில் இருப்பதால், இன்று காய்கறிகளைப் பறித்து அனுப்பும் பணிகள் நடைபெறாது. மேலும் லாரி ஓட்டுநர்களும், கோயம்பேடு சந்தை சுமை தூக்கும் தொழிலாளர்களும் தீபாவளி விடுமுறையில் சென்று விடுவார்கள். அதனால் கோயம்பேடு காய்கறி சந்தைக்கு நாளை காய்கறிகள் வராது.
இந்நிலையில் கோயம்பேடு காய்கறி சந்தைக்கு நாளை விடுமுறை விடுவது என முடிவெடுத்து இருப்பதாக கோயம்பேடு காய்கறி அங்காடி அனைத்து சங்கங்களின் கூட்டமைப்பு தலைவர் ஜி.டி.ராஜசேகரன் தெரிவித்துள்ளார். அதே நேரம் மலர் மற்றும் கனி சந்தைகள் வழக்கம் போல் இயங்கும் என வியாபாரிகள் தெரிவித்துள்ளனர்.