மதுரை: பிற மத அடையாளங்களை வெளிப்படையாக அணிந்தோரையும், இந்து கடவுள் மீது தங்களுக்கு மரியாதை உண்டு என்பதை உறுதிப்படுத்தாதோரையும் கோயில் வளாகத்துக்குள் நுழைய அனுமதிக்கக் கூடாது என உயர் நீதிமன்றம் தெளிவாக உத்தரவிட்டது.
மதுரை மாவட்ட இந்து முன்னணி ஒருங்கிணைப்பாளர் தங்கம் வெங்கடேஷ், உயர் நீதிமன்ற மதுரை அமர்வில் தாக்கல் செய்த மனுவில், ‘இந்து மதத்தைச் சாராதோர் கோயிலின் கருவறை மற்றும் மண்டபங்களுக்குள் நுழைவதைத் தடுக்கவும், அறநிலையத்துறை சட்டப்பிரிவுகளைக் கடுமையாக அமல்படுத்தவும், பிற மதச்சின்னங்களை வெளிப்படையாக அணிந்து வருவோரை அனுமதிக்கும் அதிகாரிகள் மீது குற்றவியல், துறை ரீதியான நடவடிக்கைகள் எடுக்கவும் உத்தரவிட வேண்டும்’ என கோரியிருந்தார்.
இந்த மனுவை விசாரித்த நீதிபதிகள் ஜி.ஆர்.சுவாமிநாதன், பி.முருகன் அமர்வு பிறப்பித்த உத்தரவு: இந்து கோயில்களில் அனைத்துப் பிரிவினரும் வழிபட அரசியலமைப்புச் சட்டத்தின் 25-வது பிரிவு வழிவகை செய்கிறது.
எந்தவொரு இந்துவும் கோயிலுக்குள் நுழைவதைத் தடுக்கக் கூடாது என சட்டங்களும் உள்ளன. ஆகமக் கோயில்களில், சிவாச்சாரியார்கள், தீட்சிதர்கள், பட்டர்கள் அல்லது பூசாரிகளாகப் பணியாற்றுவோரைத் தவிர மற்ற இந்துக்கள் எவரும் கருவறைக்குள் நுழைய முடியாது. கோயிலுக்கு வருபவர் பிராமணராக இருந்தாலும் கருவறையின் நுழைவாயிலில்தான் நிற்க வேண்டும். அனைத்துச் சமூகத்தினரும் ஒரே நிலையில்தான் உள்ளனர்.
இந்துக்கள் அல்லாதோரையும் கோயிலுக்குள் அனுமதிக்க வழிவகை செய்யும் விதி அறிமுகப்படுத்தப்பட்டபோது அதை உயர் நீதிமன்றம் ரத்து செய்தது. இந்துக்கள் அல்லாதோரை கோயிலுக்குள் அனுமதிக்கக் கூடாது என மதுரை அமர்வும் உத்தரவிட்டுள்ளது.
இருப்பினும் சமீபகாலமாக கடுமையான விதிமீறல்கள் நடப்பதைக் காண முடிகிறது. மீனாட்சி அம்மன் கோயில் அமைந்துள்ள மதுரை மத்திய தொகுதி எம்எல்ஏ பத்ருதீன் முஸ்தபா, தான் தேர்ந்தெடுக்கப்பட்ட பிறகு கோயில் வளாகத்துக்குள் சென்றார். அங்கு போதிய வசதிகள் செய்யப்பட்டுள்ளனவா என்று ஆய்வு செய்ய தனக்கு உரிமை இருப்பதாக அவர் வாதிட்டார்.
குடமுழுக்கின்போது அவர் கோயில் கோபுரங்களின் மீதும் ஏறினார். இத்தகைய சூழலில், சனாதன தர்மத்தை ஒழிக்க வேண்டும் என அவர் சட்டப்பேரவையில் பேசினார். இது முரண்பாடாக உள்ளது.
கிறிஸ்தவ மதத்தைச் சேர்ந்த ஓர் அமைச்சர், இந்துக்கள் அல்லாதோரிடம் கோரப்படும் உறுதிமொழியை அளிக்காமலேயே திருச்செந்தூர் கோயிலுக்குள் சென்றுள்ளார். அதேநேரத்தில், முதல்வர் ஜோசப் விஜய், உறுதிமொழிப் படிவத்தில் கையெழுத்திட்ட பிறகு மீனாட்சி அம்மனை வழிபட்ட சிறந்த உதாரணமும் கண்முன் உள்ளது.
இந்து சமய அறநிலையச் சட்டப்படி கோயிலில் ஆணையர் முதல் கடைநிலை ஊழியர் வரை அனைவரும் இந்து மதத்தைப் பின்பற்றுவோராக இருக்க வேண்டும். அதே சட்டத்தில் அதிகாரிகள்கூட கோயில் வளாகத்துக்குள் நுழையும்போது, அங்குள்ள மத நடைமுறைகள் அல்லது வழக்கங்களுக்கு உரிய மதிப்பளிக்க வேண்டும் என்று கூறுகிறது.
இந்து அல்லாத ஒருவர் விதியில் குறிப்பிடப்பட்டுள்ள இடத்துக்குள் நுழைய அனுமதி அளிக்கப்படாததைத் தெளிவுபடுத்துகிறது. தங்களின் மத அடையாளங்களை வெளிப்படையாக அணிந்திருப்போரும், அந்தந்தக் கடவுள் மீது தங்களுக்கு மரியாதை உண்டு என்பதை உறுதிப்படுத்தாதோரும் கோயில் வளாகத்துக்குள் நுழைவதற்கு அனுமதிக்கப்படக் கூடாது. இவ்வாறு உத்தரவில் நீதிபதிகள் குறிப்பிட்டுள்ளனர்.