சென்னை: குட்கா முறைகேடு வழக்கு விசாரணை சிபிஐக்கு மாற்றப்பட்டது.
அதன்படி, அதிமுக ஆட்சி காலத்தில் அமைச்சர்களாக பதவி வகித்த சி.விஜயபாஸ்கர், பி.வி.ரமணா, முன்னாள் டிஜிபி டி.கே.ராஜேந்திரன், சென்னை மாநகர முன்னாள் காவல் ஆணையர் எஸ்.ஜார்ஜ் உள்ளிட்ட 26 பேர் மீது சிபிஐ வழக்குப் பதிவு செய்தது. இந்த வழக்கு விசாரணை சென்னையில் உள்ள எம்.பி. எம்எல்ஏக்கள் மீதான வழக்குகளை விசாரிக்கும் சிறப்பு நீதிமன்றத்தில் நடந்து வருகிறது.
இந்த வழக்கில் விசாரணை அதிகாரியிடம் வாக்குமூலம் அளிக்காதவர்களை சாட்சிகள் பட்டியலில் இருந்து நீக்கக்கோரி மாநகர முன்னாள் காவல் ஆணையர் எஸ்.ஜார்ஜ் மனு தாக்கல் செய்தார். அந்த மனுவை தள்ளுபடி செய்த உயர் நீதிமன்றம், வழக்கை 12 வாரங்களுக்குள் விசாரித்து முடிக்க சிறப்பு நீதிமன்றத்துக்கு கடந்த ஜூலை 4-ல் உத்தரவிட்டது.
இந்நிலையில் மேலும் 3 மாதங்கள் அவகாசம் கோரி சிறப்பு நீதிமன்றம் சார்பில் உயர் நீதிமன்றத்துக்கு கடிதம் அனுப்பப்பட்டது. இதுதொடர்பான வழக்கு உயர் நீதிமன்றத்தில் நீதிபதி வி.லட்சுமி நாராயணன் முன்பாக விசாரணைக்கு வந்தது. அப்போது சிபிஐ தரப்பில்,“இந்த வழக்கில் 250-க்கும் மேற்பட்ட சாட்சிகளிடம் விசாரணை நடத்தப்படவுள்ளது. குற்றச்சாட்டு பதிவுக்கு முந்தைய நிலையில் விசாரணை உள்ளது” என கூறப்பட்டது.
அதையடுத்து நீதிபதி, இந்த வழக்கில் 250-க்கும் மேற்பட்ட சாட்சிகள் உள்ள நிலையில், 3 மாதங்களில் எப்படி விசாரித்து முடிக்க முடியும் என விசாரணை நீதிமன்றத்துக்கு கேள்வி எழுப்பினார். பின்னர் இதுதொடர்பாக அறிக்கை தாக்கல் செய்ய உத்தரவிட்டு விசாரணையை நவ.6-க்கு தள்ளிவைத்தார்.