சென்னை: தமிழகத்தில் சட்டம் ஒழுங்கு சரியில்லை என முன்னாள் காங்கிரஸ் மாநிலத் தலைவர் செல்வப்பெருந்தகை குற்றம்சாட்டிய விவகாரத்தில் தற்போதைய மாநிலத் தலைவர் மாணிக்கம் தாகூர் கொடுத்துள்ள பதிலடியால் தமிழக காங்கிரஸ் கட்சிக்குள் மீண்டும் உட்கட்சிப் பூசல் வெடித்துள்ளது.
தமிழக காங்கிரஸ் கட்சியும் கோஷ்டிப் பூசலும் பிரிக்க முடியாதவை என அரசியல் வட்டாரத்தில் நீண்டகாலமாகப் பேசப்படும் ஒன்றாகும். இந்நிலையில் தமிழகத்தில் சட்டம் ஒழுங்கு விவகாரம் குறித்து செல்வப் பெருந்தகையின் கருத்து மீது பரஸ்பரம் விமர்சனம் செய்வதால் சத்தியமமூர்த்தி பவன் பரபரப்பாக காணப்படுகிறது.
தமிழக அரசின் செயல்பாடுகள் குறித்து சென்னையில் நேற்று முன்தினம் செய்தியாளர்களிடம் செல்வப்பெருந்தகை பேசும்போது, “தமிழகத்தில் சட்டம், ஒழுங்கு இன்னும் பலப்படுத்தப்பட வேண்டும். தற்போதைய நிலை திருப்தி அளிக்கும் வகையில் இல்லை” என கருத்து தெரிவித்திருந்தார்.
தொடர்ந்து, மாணிக்கம் தாகூரை நேரடியாகக் குறிவைத்துப் பேசிய அவர், ’சனியன் பிடித்தவர்கள்’ என மாணிக்கம் தாகூர் யாரைச் சொன்னார் எனத் தெரியவில்லை. 2009-ல் சோனியா காந்தி தலைவராக இருந்தார். ராகுல் காந்தி இளைஞர் அணியைப் பார்த்துக்கொண்டிருந்தார்.
எனவே, அவர் யாரை அந்த வார்த்தையைச் சொல்கிறார் என்பதைத் தெளிவுபடுத்த வேண்டும் எனக் கேள்வி எழுப்பினார்.
மேலும், கள்ளக்குறிச்சி பெண் ஆட்சியருக்கு ஆபாச குறுஞ் செய்தி அனுப்பிய விவகாரத்தில் தவெக எம்எல்ஏ-வை ‘பாவம்’ என மாணிக்கம் தாகூர் குறிப்பிட்டதைச் சுட்டிக்காட்டிய அவர், “அப்படியென்றால் எப்ஸ்டீனையும், ஜெம் வீரமணியையும் கூடப் பாவம் எனச் சொல்ல முடியுமா?” என விமர்சித்திருந்தார்.
இதற்கு மாணிக்கம் தாகூர் அளித்த பதிலில், “செல்வப்பெருந்தகை கூறியது அவருடைய தனிப்பட்ட கருத்து. அவர் தற்போது காங்கிரஸில் எந்தப் பொறுப்பிலும் இல்லை. தமிழகத்தில் முந்தைய திமுக ஆட்சியில் நடந்த கொலை, கொள்ளைகளை ஒப்பிடும்போது இப்போது குற்றங்கள் குறைவாகவே இருக்கின்றன.
தற்போது நடக்கும் நேர் மையான ஆட்சியைப் பார்க்கிறவர்களுக்கு பயமாக இருக்கிறது. யாரெல்லாம் திருட்டுத்தனம் செய்தார்களோ, ஊழல் செய்தார்களோ அவர்களுக்குத்தான் பயம். அவர்கள் இப்படித்தான் புலம்பிக் கொண்டிருப்பார்கள்” என பதிலளித்தார்.
இந்த மோதல் குறித்து, அமைச்சர் விஸ்வநாதன் கூறும்போது, “செல்வப்பெருந்தகை சட்டம் ஒழுங்கு சரியில்லை என எந்தக் கட்சியிலிருந்து கொண்டு இதைப் பேசுகிறார் என்பதும் எந்தக் கட்சியில் இருக்கிறார் என்பதும் புரியவில்லை.
முதலில் அவர் எந்தக் கட்சிக்குப் போகப்போகிறார் என்பதைத் தெளிவுபடுத்தட்டும்” என்றார். இந்த வார்த்தை போர்களால் தமிழக காங்கிரஸில் உட்கட்சிப் பூசல் கிளம்பியுள்ளதாக அரசியல் நோக்கர்கள் கூறுகின்றனர்.