சென்னை: தமிழகத்தில் நாளை தீபாவளி கொண்டாடப்படும் நிலையில், சென்னை, கோவை, மதுரை, திருச்சி, திருநெல்வேலி உள்ளிட்ட முக்கிய நகரங்களின் வணிக வீதிகளில் புத்தாடை, பட்டாசு, இனிப்புகளை வாங்க மக்கள் குவிந்தனர்.
தீபாவளியை முன்னிட்டு, சென்னை, கோவை உள்ளிட்ட பெருநகரங்களில் இயங்கும் துணிக் கடைகளில் விதி விதமான புத்தாடைகள் தள்ளுபடி விலையில் விற்பனைக்கு வைக்கப்பட்டிருந்தன.
பொதுமக்கள் கடந்த வாரம் சனி மற்றும் ஞாயிற்றுக்கிழமையில் ஓரளவு புத்தாடை மற்றும் பட்டாசுகளை வாங்கி வைத்திருந்தனர்.
நேற்று தங்கள் சொந்த ஊர்களுக்கு புறப்பட திட்டமிட்டிருந்த நிலையில், நேற்றும் காலை முதலே துணிக்கடை மற்றும் பட்டாசுக் கடைகளில் மக்கள் கூட்டம் அலைமோதியது.
சென்னை தியாகராய நகர் ரங்கநாதன் தெருவில் தீபாவளி ஜவுளி விற்பனையால் களைகட்டியுள்ளது. | படம்: ம.பிரபு |
குறிப்பாக இனிப்பு கடைகளில் மக்கள் குவிந்தனர். சென்னை மற்றும் புறநகரில் பிரதான வர்த்தக பகுதிகளான தியாகராய நகர், புரசைவாக்கம், வண்ணாரப்பேட்டை, பிராட்வே, குரோம்பேட்டை, பள்ளிக்கரணை பகுதிகளில் சாலைகளில் மக்கள் கூட்டம் அலைமோதியது.
இதேபோன்று மதுரை விளக்குத்தூண், தெற்குமாசி வீதியிலும், கோவை டவுன்ஹால், காந்திபுரம் மற்றும் கிராஸ்கட் சாலை, ஒப்பணக்கார வீதி, திருச்சி என்எஸ்பி சாலை, பெரியக்கடை வீதி, திருநெல்வேலி நெல்லையப்பர் கோயிலைச் சுற்றியுள்ள மாடவீதிகளில் கூட்டம் அலை மோதியது.
ஹோட்டல்களிலும் கூட்டம் கூடியது. காத்திருந்து உணவருந்தினர். போலீஸார்பாதுகாப்பு பணிகளில் ஈடுபட்டனர்.
சென்னை தீவுத்திடலில் பட்டாசுகள் விற்பனையும் களை கட்டியது. இனிப்பு கடைகளிலும் வகை வகையான் இனிப்புகள் விற்பனைக்கு வைக்கப்பட்டிருந்தன.