சென்னை: தெற்கு அந்தமான் கடல் பகுதியில் நிலை கொண்டுள்ள காற்றழுத்தத் தாழ்வு மண்டலம் இன்று புயலாக மாறும். இந்த புயலுக்கு இந்தியா பரிந்துரைத்த ‘முரசு’ என்று பெயரிடப்பட உள்ளது.
இதுகுறித்து இந்திய வானிலை ஆய்வு மையம் வெளியிட்ட செய்திக் குறிப்பில் கூறியிருப்பதாவது: வெள்ளிக்கிழமை (அக்.30) தெற்கு அந்தமான் கடல் பகுதிகள் மற்றும் அதை ஒட்டிய அந்தமான் நிகோபார் தீவுகளில் நிலவிய காற்றழுத்தத் தாழ்வுப் பகுதி நேற்று காலை ஆழ்ந்த காற்றழுத்தத் தாழ்வுப் பகுதியாக வலுவடைந்து மதியம் காற்றழுத்தத் தாழ்வு மண்டலமாக வலுவடைந்தது. இது ஆந்திர மாநிலம் ஸ்ரீவிஜயாபுரத்தில் இருந்து மேற்கு தென்மேற்கே 330 கி.மீ. தொலைவிலும், சென்னைக்கு கிழக்கு - தென் கிழக்கே 1,140 கி.மீ. தொலைவிலும் நிலைகொண்டிருந்தது.
இந்த காற்றழுத்தத் தாழ்வு மண்டலம் மேற்கு-வடமேற்கு திசையில் நகர்ந்து, நவ.1-ம் தேதி அதிகாலையில் ஆழ்ந்த காற்றழுத்தத் தாழ்வு மண்டலமாகவும், தொடர்ந்து புயலாகவும் வலுவடையக் கூடும். இப்புயல் நவ.2-ம் தேதி மாலை ஆந்திர கடலோரப் பகுதியை நெருங்கி வரும். இதன் காரணமாக, நவ.2, 3 ஆகிய தேதிகளில் தமிழகத்தில் ஓரிரு இடங்களில் கனமழையும், அநேக இடங்களில் லேசானது முதல் மிதமான மழையும் பெய்யக்கூடும். புயல் கரையை கடக்கும்போது, மணிக்கு 80 முதல் 90 கி.மீ. வேகத்தில் பலத்த சூறாவளிக் காற்று வீசும்.
ஆந்திர கடல் பகுதிகளில் நவ. 4-ம் தேதி வரை பலத்த சூறாவளிக் காற்று வீசும் என்பதால், மீனவர்கள் இப்பகுதிகளுக்கு செல்ல வேண்டாம் என அறிவுறுத்தப்பட்டுள்ளது. இவ்வாறு இந்திய வானிலை மையம் கூறியுள்ளது. வங்கக்கடலில் இன்று உருவாகும் புயலுக்கு இந்தியா பரிந்துரைத்த ‘முரசு’ என்ற பெயர் வைக்கப்பட உள்ளது.
சென்னை வானிலை ஆய்வு மையம் நேற்று கூறியுள்ளதாவது: கேரள - கர்நாடக கடலோர பகுதிகளுக்கு அப்பால் உள்ள தென்கிழக்கு அரபிக்கடல் பகுதிகளில் இருந்து தெற்கு மகாராஷ்டிர கடலோரப் பகுதிகள் மற்றும் அதை ஒட்டிய பகுதிகளின் மேல் நிலவும் வளிமண்டல சுழற்சி வரை ஒரு காற்றழுத்தத் தாழ்வுப் பாதை நிலவுகிறது.
இதன் காரணமாக, நவ.1-ம் தேதி வட கடலோர தமிழக மாவட்டங்கள், மேற்கு தொடர்ச்சி மலை மாவட்டங்கள், மதுரை, திருச்சி, நாமக்கல், சேலம், ஈரோடு, கரூர் ஆகிய 6 மாவட்டங்களில் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் லேசானது முதல் மிதமான மழை பெய்யக் கூடும்.
நவ.2-ம் தேதி நீலகிரி, திருவள்ளூர் ஆகிய 2 மாவட்டங்களில் ஓரிரு இடங்களில் கனமழை பெய்யக் கூடும். ஏனைய தமிழகத்தில் ஒரு சில இடங்களிலும், புதுச்சேரி மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். சென்னை மற்றும் புறநகர் பகுதிகளில் நவ.1-ம் தேதி வானம் மேகமூட்டத்துடன் காணப்படும். நகரின் சில பகுதிகளில் இடியுடன் கூடிய லேசானது முதல் மிதமான மழை பெய்யக் கூடும். இவ்வாறு அதில் கூறப்பட்டுள்ளது.