சென்னை: அம்மன் கோயிலுக்கு சொந்தமான பல கோடி ரூபாய் மதிப்புள்ள 20.4 ஏக்கர் நிலத்தை தனி நபர்களின் பெயர்களில் பட்டா மாறுதல் செய்ய ஆட்சேபனையில்லா சான்று அளித்த கோயில் செயல் அலுவலரின் பணிநீக்கத்தை ரத்து செய்ய மறுத்துவிட்ட உயர் நீதிமன்றம், நிலம் மீட்பு குறித்து அறிக்கை தாக்கல் செய்ய அறநிலையத் துறைக்கு உத்தரவிட்டுள்ளது.
கடந்த 2012-ம் ஆண்டு கோவை வடவள்ளியில் உள்ள மதிப்பாநல்லூர் அம்மன் கோயிலுக்குச் சொந்தமான பல கோடி ரூபாய் மதிப்புள்ள 20.4 ஏக்கர் நிலத்தை தனி நபர்களின் பெயர்களில் பட்டா மாறுதல் செய்ய ஆட்சேபனையில்லா சான்று அளித்து உடந்தையாக செயல்பட்டதாக அந்தக் கோயிலின் செயல் அலுவலர் ராமகிருஷ்ணன் மீது குற்றம்சாட்டப்பட்டது.
அதுதொடர்பான விசாரணைக்குப்பிறகு அவரை பணிநீக்கம் செய்து அறநிலையத்துறை ஆணையர் 2014-ம் ஆண்டு உத்தரவிட்டார். இதை எதிர்த்து ராமகிருஷ்ணன், உயர் நீதிமன்றத்தில் வழக்கு தொடர்ந்திருந்தார்.
இதை விசாரித்த நீதிபதி கே.கோவிந்தராஜன், கோயில் நிலத்தை தனியாருக்கு தாரை வார்த்த கோயில் செயல் அலுவலரின் பணி நீக்கம் சரியானதுதான் என்பதால் அதில் தலையிட விரும்பவில்லை.
மேலும், முறைகேடாக தனி நபர்களின் பெயர்களுக்கு பட்டா மாறுதல் செய்யப்பட்ட கோயில் நிலத்தை மீட்க எடுக்கப்பட்ட நடவடிக்கை குறித்து அறநிலையத் துறை அதிகாரிகள் அக்.28-க் குள் அறிக்கை தாக்கல் செய்ய வேண்டும் என உத்தரவிட்டு விசாரணையை அக்.30-க்கு தள்ளிவைத்தார்.