சென்னை: ஜெம் வீரமணி வழக்கில் திமுகவை இணைத்துப் பேசிய அமைச்சர்கள் நிர்மல்குமார், ஆதவ் அர்ஜூனா மற்றும் தவெக ஐடி பிரிவுக்கு எதிராக ரூ.1 கோடியே 1 லட்சம் மானநஷ்டஈடு கோரி அவதூறு வழக்குத்தொடர திமுகவுக்கு அனுமதியளித்து உயர் நீதிமன்றம் உத்தரவிட்டுள்ளது.
சிறுமிகளை பாலியல் வன்கொடுமை செய்ததாக குற்றம் சாட்டப்பட்ட ஜெம் கிரானைட் உரிமையாளரான வீரமணிக்கு எதிரான வழக்கில் முந்தைய திமுக அரசு உரிய நடவடிக்கை எடுக்காமல் அவரை தப்பிக்க விட்டதாக தவெக அமைச்சர்களான சிடிஆர்.நிர்மல்குமார், ஆதவ் அர்ஜூனா ஆகியோர் குற்றம் சாட்டி பேசியிருந்தனர். இதேபோல தவெக தகவல்தொழில்நுட்ப பிரிவும் இந்த விவகாரத்தில் திமுகவை குற்றம் சாட்டி சமூக வலைதளப் பக்கத்தில் பதிவிட்டிருந்தது.
தவெக அமைச்சர்கள் நிர்மல்குமார், ஆதவ் அர்ஜூனா மற்றும் தவெக ஐடி பிரிவின் இத்தகைய செயல் திமுகவுக்கு களங்கம் ஏற்படுத்தும் வகையில் உள்ளதாகவும், எனவே திமுகவுக்கு எதிராக அவதூறான கருத்து தெரிவிக்க தடை விதிக்க வேண்டும் என்றும், ரூ.1 கோடியே 1 லட்சத்தை மான நஷ்டஈடாக வழங்க உத்தரவிட வேண்டும் எனக்கோரி திமுக பொதுச் செயலாளரும், முன்னாள் அமைச்சருமான துரைமுருகன் சென்னை உயர் நீதிமன்றத்தில் வழக்கு தொடர்ந்திருந்தார்.
அதில், சிறுமிகளை பாலியல் ரீதியாக துன்புறுத்தியதாக ஜெம் வீரமணிக்கு எதிராக கடந்தாண்டு அக்டோபர் 6 அன்று புகார் பெறப்பட்ட நிலையில் எவ்வித தாமதமுமின்றி மறுநாளே வழக்குப்பதிவு செய்யப்பட்டது என்றும், இதில் எவ்வித அரசியல் தலையீடும் இல்லாமல் நடவடிக்கை எடுக்கப்பட்டது என்றும், உண்மைக்கு மாறாக திமுகவுக்கு எதிராக சமூக வலைதளத்தில் பதிவிடப்பட்டுள்ள அவதூறு கருத்துக்களை நீக்க உத்தரவிட வேண்டும் என்றும், இதுதொடர்பாக அமைச்சர்கள் நிர்மல்குமார், ஆதவ் அர்ஜூனா மற்றும் தவெக ஐடி பிரிவுக்கு எதிராக வழக்கு தொடர அனுமதியளிக்க வேண்டும் என்றும் கோரியிருந்தார்.
இந்த வழக்கு நீதிபதி கே.ஜி. திலகவதி முன்பாக ஏற்கெனவே விசாரணைக்கு வந்தது. அப்போது அரசு தலைமை வழக்கறிஞர் விஜய் நாராயண் ஆஜராகி, அமைச்சர்களுக்கு எதிராக வழக்குத் தொடர வேண்டுமென்றால் முன்கூட்டியே சட்ட ரீதியாக நோட்டீஸ் வழங்கியிருக்க வேண்டும். அதுபோல எவ்வித நோட்டீஸூம் வழங்காமல் தொடரப்பட்டுள்ள இந்த வழக்கு விசாரணைக்கு உகந்ததல்ல என்பதால் தள்ளுபடி செய்ய வேண்டும், என வாதிட்டார்.
அப்போது, திமுக சார்பில் ஆஜரான மூத்த வழக்கறிஞர் ஜெ. ரவீந்திரன், இந்த வழக்கை அமைச்சர்கள் என்ற முறையில் தொடராமல், தனி நபர்கள் என்ற முறையிலேயே தொடர்ந்துள்ளதாக தெரிவித்தார். இருதரப்பு வாதங்களையும் கேட்ட நீதிபதி திமுகவின் மனு மீதான தீர்ப்பை தள்ளி வைத்திருந்தார்.
இந்நிலையில் நீதிபதி கே.ஜி.திலகவதி நேற்று பிறப்பித்த உத்தரவில், ஜெம் வீரமணி வழக்கில் திமுகவை இணைத்துப் பேசியதாக தமிழக அமைச்சர்கள் நிர்மல்குமார், ஆதவ் அர்ஜூனா மற்றும் தவெக ஐடி பிரிவுக்கு எதிராக திமுக சார்பில் ரூ.1 கோடியே 1 லட்சம் மானநஷ்டஈடு கோரி அவதூறு வழக்குத் தொடர அனுமதியளித்து உத்தரவிட்டுள்ளார்.