சென்னை: அரசு விரைவுப் போக்குவரத்துக் கழகத்துக்கு ரூ.34.30 கோடி மதிப்பிலான பல அச்சுகள் கொண்ட 20 அதிநவீன குளிர்சாதன சொகுசு பேருந்துகள் இயக்கத்தை முதல்வர் மு.க.ஸ்டாலின் சென்னையில் நேற்று கொடியசைத்து தொடங்கி வைத்தார்.
அரசு போக்குவரத்துக் கழகங்கள் தொடங்கப்பட்டு 50-ம் ஆண்டு (1976- 2025) பொன்விழா நடைபெற்று வருவதையொட்டி போக்குவரத்து கழகங்களில் பணியாற்றி வரும் 1 லட்சத்து 5,778 ஊழியர்களுக்கு ரூ.3.33 கோடி மதிப்பிலான சுவர் கடிகாரங்கள் வழங்கிடும் விதமாக 10 போக்குவரத்து ஊழியர்களுக்கு சுவர் கடிகாரங்களை முதல்வர் வழங்கினார்.
நிகழ்ச்சிக்கு பின் அமைச்சர் சிவசங்கர் செய்தியாளர்களிடம் கூறியதாவது: சிறந்த பயண அனுபவத்தை இப்பேருந்துகள் வழங்கும். 1 கி.மீட்டருக்கு 120 பைசா என்ற அடிப்படையில் கட்டணம் நிர்ணயிக்கப்பட்டுள்ளது.
மக்களின் வரவேற்பை பொறுத்து கூடுதல் பேருந்துகள் வாங்குவது குறித்து முடிவெடுக்கப்படும். தற்போது டீசல் பேருந்துகள் இயக்கப்படுகிறது, எதிர்காலத்தில் மின்சார பேருந்துகளும் பயன்பாட்டுக்கு வரலாம். கிளாம்பாக்கத்தில் இருந்து இந்த பேருந்துகள் இயக்கப்படும்.
ஆம்னி பேருந்துகள் நீதிமன்ற ஆணையை பெற்று கோயம்பேட்டில் இருந்து இயக்குகின்றனர். நீதிமன்ற ஆணையின் காலக்கெடு முடிந்த பின் அவர்களும் கிளாம்பாக்கத்தில் இருந்துதான் இயக்க வேண்டும். இவ்வாறு அவர் கூறினார்.
இந்நிகழ்ச்சியில், அமைச்சர்கள் மு.பெ.சாமிநாதன், பி.கே.சேகர்பாபு, ஆ.ராசா எம்.பி. மேயர் ஆர். பிரியா, துறை செயலாளர் சுன்சோங்கம் ஜடக் சிரு, மாநகர போக்குவரத்து கழக மேலாண் இயக்குநர் த.பிரபுசங்கர், அரசு விரைவுப் போக்குவரத்துக் கழக மேலாண் இயக்குநர் மோகன், விஇ வணிக வாகனங்கள் நிறுவன முதுநிலை துணை தலைவர் சுரேஷ் மற்றும் உயர் அலுவலர்கள் கலந்து கொண்டனர்.
பேருந்தில் உள்ள நவீன வசதிகள்: புதிய பேருந்துகளில் 2-க்கு 2 அமைப்புடன் 51 வசதியான இருக்கைகள், விசாலமான ஜன்னல்கள், மேல்நிலை பொருட்கள் வைக்குமிடம், கால்களை நீட்டி அமரும் வசதியுடன் கூடிய இருக்கைகள், இரட்டை சார்ஜிங் மையங்கள், பாட்டில் ஹோல்டர், காலணி வைக்கும் இடம், முழங்கால் பாதுகாப்பு அமைப்பு, மேம்பட்ட சஸ்பென்சன் அமைப்பு, ஸ்டியரிங் ஸ்டெபிலிட்டி, ஏர் ஸ்பிரிங்குகளில் குறைந்த அழுத்தம், மேம்பட்ட பிரேக்கிங் மற்றும் பாதுகாப்பு அமைப்புகள், தீ பாதுகாப்பு அமைப்பு, அவசர நிலையில் விரைவாக பயணிகளை வெளியேற்ற அகலமான ரூஃப் எஸ்கேப் ஹட்ச், முன், பின் மற்றும் பக்க மோதல்களில் தாக்கத்தை குறைக்கும் பாதுகாப்பு அமைப்புகள், விபத்துகளை தவிர்க்க வாகனத்தின் முன் மற்றும் பின் பகுதிகளில் கேமராக்கள், வாகன செயல்திறன் மற்றும் கோளாறுகளை உடனுக்குடன் கண்டறிய மின்னணு அமைப்பு, ரிவர்ஸ் சென்சார் வசதி மற்றும் கேமரா உள்ளிட்ட பல்வேறு வசதிகளுடன் இப்பேருந்துகள் வடிவமைக்கப்பட்டுள்ளன.
கட்டண விவரம்: சென்னை - மதுரை - ரூ.790, சென்னை - திருநெல்வேலி - ரூ.1,080, சென்னை - திருச்செந்தூர் - ரூ.1,115, சென்னை - சேலம் - ரூ.575, சென்னை - திருப்பூர் - ரூ.800, சென்னை - பெங்களூரு - ரூ.735, கோவை - சென்னை - ரூ.880, கோவை - பெங்களூரு - ரூ.770, நாகர்கோவில் - சென்னை - ரூ.1,215, திருச்சி - சென்னை - ரூ.565 என கட்டணம் நிர்ணயிக்கப்பட்டுள்ளது.