சென்னை: தமிழகம் முழுவதும் மழைநீர் சேமிப்பை மக்கள் இயக்கமாக முன்னெடுக்கும் வகையில், ‘துளி’ இலச்சினையை முதல்வர் விஜய் நேற்று வெளியிட்டு விழிப்புணர்வு இயக்கத்தை தொடங்கி வைத்தார்.
நகராட்சி நிர்வாகத் துறை சார்பில் மழைநீர் சேமிப்பு விழிப்புணர்வு நிகழ்ச்சி சென்னை சேப்பாக்கத்தில் உள்ள குடிநீர் வடிகால் வாரியத் தலைமையகத்தில் நேற்று நடைபெற்றது. இதில் சிறப்பு விருந்தினராகக் கலந்து கொண்ட முதல்வர் விஜய், மழைநீர் சேமிப்பு விழிப்புணர்வுக்கான ‘துளி’ இலச்சினையை வெளியிட்டார். தொடர்ந்து அங்கு அமைக்கப்பட்டிருந்த மழைநீர் சேகரிப்பு மாதிரி இல்லத்தைப் பார்வையிட்டார்.
அதன்பின்னர், மெரினா கடற்கரையில் நடைபெற்ற நிகழ்ச்சியில் மாநகராட்சிகள், நகராட்சிகள், பேரூராட்சிகள், ஊராட்சிகளில் விழிப்புணர்வு ஏற்படுத்தும் இயக்கத்தைத் தொடங்கி வைத்து குறும்படத்தையும் பார்வையிட்டார்.
இதுகுறித்து தமிழக அரசு வெளியிட்ட செய்திக் குறிப்பில் கூறியிருப்பதாவது:
தற்போது அதிகரித்து வரும் நீர்த் தேவை, நகரமயமாக்கல், மாறி வரும் மழைப்பொழிவு, காலநிலை மாற்றம் ஆகியவற்றைக் கருத்தில் கொண்டு, நிலத்தடி நீர்வளங்களைப் பாதுகாக்க மழைநீர் சேமிப்பு இயக்கம் முன்னெடுக்கப்படுகிறது.
இதன்படி அனைத்து மாவட்டங்களிலும் அரசு அலுவலகங்கள், பொதுக் கட்டிடங்கள், மருத்துவமனைகள், பள்ளிகள், அடுக்குமாடிக் குடியிருப்புகள், வணிகக் கட்டிடங்களில் உள்ள மழைநீர் சேகரிப்புக் கட்டமைப்புகள் ஆய்வு செய்யப்பட்டு சீரமைக்கப்படும். புதிய கட்டிடங்கள் மட்டுமின்றி, ஏற்கெனவே உள்ள வீடுகள், நிறுவனங்கள், வணிக வளாகங்கள், தொழிற்சாலைகளிலும் மழைநீர் சேகரிப்பு அமைப்புகளை ஏற்படுத்த ஊக்குவிக்கப்படும்.
மழைநீர் சேகரிப்பு குறித்து உள்ளாட்சி அலுவலர்கள், பொறியாளர்கள், ஆசிரியர்கள், மாணவர்கள், சுய உதவிக் குழுவினர், குடியிருப்போர் நலச் சங்கத்தினர், தன்னார்வலர்களுக்கு பயிற்சிகள் வழங்கப்படும். பணிகளின் முன்னேற்றம் குறித்த புகைப்படங்கள், புவியிடக் குறியீடுகள் மற்றும் இணையவழி அறிக்கைகள் மூலம் ஆவணப்படுத்தப்படும்.
குறிப்பாக, மழைநீர் செறிவூட்டும் அகழிகள், நீர் ஊடுருவும் குழிகள், செறிவூட்டும் கிணறுகள் போன்ற அமைப்புகள் நிலத்தின் தன்மைக்கேற்ப உருவாக்கப்படும். மழைநீர் சேமிப்புப் பணிகளில் சிறப்பாகச் செயல்படும் மாவட்டங்கள், உள்ளாட்சி அமைப்புகள், பள்ளிகள், கல்லூரிகள், சமூக அமைப்புகளுக்கு விருதுகளும் வழங்கப்படும்.
மேலும், வளங்களைத் திறம்படப் பயன்படுத்தவும், ஒரே பணியை மீண்டும், மீண்டும் மேற்கொள்வதைத் தவிர்க்கவும், நடைமுறையில் உள்ள மற்ற நீர்வளத் திட்டங்களுடன் இந்த இயக்கம் ஒருங்கிணைக்கப்படும்.
எனவே, பொதுமக்கள் மற்றும் நிறுவனத்தினர் தங்கள் கட்டிடங்களில் மழைநீர் சேகரிப்புக் கட்டமைப்புகளைச் சீரமைத்து, அரசின் இந்த முன்னெடுப்புக்கு உறுதுணையாக இருக்க வேண்டும். இவ்வாறு தமிழக அரசு வெளியிட்ட செய்திக்குறிப்பில் தெரிவிக்கப்பட்டுள்ளது.
நிகழ்ச்சியில் அமைச்சர்கள் ஆதவ் அர்ஜுனா, ராஜ்மோகன், ரா.குமார், நெ.மரிய வில்சன் மற்றும் அரசு துறை அதிகாரிகள் பங்கேற்றனர்.