சென்னை: தமிழகத்தில் மதுராந்தகம், தாராபுரம் ஆகிய 2 தொகுதிகளுக்கான இடைத்தேர்தல் பிரச்சாரம் இன்று முடிவடைகிறது. ஆளும் தவெக மற்றும் திமுக, அதிமுக கட்சியினர் கடைசிகட்ட வாக்கு சேகரிப்பில் தீவிரமாக ஈடுபட்டுள்ளனர். தேர்தலை அமைதியாக நடத்த பலத்த பாதுகாப்பு ஏற்பாடுகள் செய்யப்பட்டுள்ளன.
தமிழகத்தில் மதுராந்தகம், தாராபுரம் ஆகிய 2 தனித் தொகுதிகளில் இடைத்தேர்தல் அக்டோபர் 6-ம் தேதி நடைபெறுகிறது. இதற்கான வேட்புமனு தாக்கல் கடந்த செப்டம்பர் 9-ம் தேதி தொடங்கி 16-ம் தேதி முடிவடைந்தது. மதுராந்தகம் தொகுதியில் மரகதம் குமரவேல் (தவெக), பரந்தாமன் (திமுக), கணிதா சம்பத் (அதிமுக), சுகந்தி (மார்க்சிஸ்ட்), ஜானகிராமன் (நாம் தமிழர்) மற்றும் சுயேச்சைகள் என மொத்தம் 28 பேர் களத்தில் உள்ளனர்.
அதேபோல், தாராபுரம் தொகுதியில் சத்யபாமா (தவெக), சுகன்யா (திமுக), பானுமதி (அதிமுக), லட்சுமணன் (இந்திய கம்யூனிஸ்ட்), கார்த்திகா (நாதக) உள்ளிட்டோர் போட்டியிடுகின்றனர்.
தவெக வேட்பாளர்களை ஆதரித்து முதல்வர் விஜய் செப்டம்பர் 25 மற்றும் அக்டோபர் 2-ம் தேதி, மதுராந்தகம் தொகுதியில் பிரச்சாரம் செய்தார். செப்டம்பர் 30-ம் தேதி தாராபுரம் தொகுதியில் பிரச்சாரம் செய்த முதல்வர், மீண்டும் இன்று அங்கு பிரச்சாரத்துக்குச் செல்கிறார்.
திமுக வேட்பாளர்களுக்கு ஆதரவாக அந்தக் கட்சித் தலைவர் மு.க.ஸ்டாலின், இளைஞரணி செயலாளர் உதயநிதி உள்ளிட்டோரும், அதிமுக வேட்பாளர்களை ஆதரித்து அக்கட்சியின் பொதுச் செயலாளர் பழனிசாமியும் பிரச்சாரம் செய்தனர். கம்யூனிஸ்ட் வேட்பாளர்களுக்கு வாக்கு கேட்டு அக்கட்சிகளின் மாநில நிர்வாகிகளும், நாதக தலைமை ஒருங்கிணைப்பாளர் சீமானும் இரு தொகுதிகளிலும் தீவிர பிரச்சாரம் மேற்கொண்டனர்.
இந்நிலையில் இரு தொகுதிகளிலும் இடைத்தேர்தல் பிரச்சாரம் இன்று மாலை 6 மணியுடன் நிறைவடைகிறது. இதையடுத்து இறுதி கட்ட வாக்கு சேகரிப்பில் வேட்பாளர்களும், கட்சி நிர்வாகிகளும் தீவிரம் காட்டி வருகின்றனர். பிரச்சாரத்துக்கு இன்று கடைசி நாள் என்பதால், தவெக சார்பில் போட்டியிடும் வேட்பாளர் சத்யபாமாவை ஆதரித்து பிரச்சாரம் செய்ய தமிழக முதல்வர் விஜய் இன்று தாராபுரம் வருகிறார். இதற்காகக் கோவையில் இருந்து ஹெலிகாப்டரில் தாராபுரம் வரும் முதல்வர் விஜய், பிரம்மாண்ட ‘ரோட் ஷோ’ மூலம் பிரச்சாரத்தில் ஈடுபடுகிறார்.
தொடர்ந்து அக்டோபர் 6-ம் தேதி வாக்குப்பதிவும், 9-ம் தேதி வாக்கு எண்ணிக்கையும் நடைபெறுகிறது. வாக்குப் பதிவையொட்டி தொகுதி முழுவதும் பலத்த பாதுகாப்பு ஏற்பாடுகள் செய்யப்பட்டுள்ளன. அத்துடன் தொகுதிகளில் பல்வேறு கடும் கட்டுப்பாடுகளும் அமலுக்கு வரவுள்ளன.
6-ம் தேதி வாக்குப்பதிவு: இதுதொடர்பாக தமிழகத் தலைமைத் தேர்தல் அதிகாரி அர்ச்சனா பட்நாயக் வெளியிட்ட செய்திக்குறிப்பில் கூறியிருப்பதாவது: மதுராந்தகம், தாராபுரம் ஆகிய தனித்தொகுதிகளில் இடைத்தேர்தல் வாக்குப்பதிவு அக்டோபர் 6-ம் தேதி காலை 7 முதல் மாலை 6 மணி வரை நடைபெறும். இதையடுத்து இன்று (அக்.4) மாலை 6 மணி முதல் வாக்குப் பதிவு முடியும் வரை மக்கள் பிரதிநிதித்துவச் சட்டத்தின் கீழ் பல்வேறு கட்டுப்பாடுகள் அமலில் இருக்கும். அதன்படி தேர்தல் பொதுக் கூட்டம், ஊர்வலம் நடத்த அல்லது அவற்றில் பங்கேற்க கூடாது.
இதுதவிர தேர்தல் பிரச்சாரம் தொடர்பான எந்தத் தகவலையும் திரைப்படம், டிவி, எப்எம் ரேடியோ, வாட்ஸ் ஆப், முகநூல், ட்விட்டர் உள்ளிட்ட எந்த ஊடகங்கள் வாயிலாகவும் பொதுமக்களின் பார்வைக்கு வெளியிடக் கூடாது. பொதுமக்களை ஈர்க்கும் வகையில் எந்தவொரு பொழுது ப் போக்கு நிகழ்ச்சியையும் நடத்தக் கூடாது. இதை மீறினால் 2 ஆண்டுகள் சிறை அல்லது அபராதம் விதிக்கப்படும்.
அதேபோல், தொகுதிக்கு வெளியில் இருந்து அழைத்து வரப்பட்ட அரசியல் கட்சி நிர்வாகிகள், கட்சிப் பணியாளர்கள் மற்றும் வாக்காளர்கள் அல்லாதோர் மாலை 6 மணிக்கு மேல் தொகுதியை விட்டு வெளியேற வேண்டும். மேலும், கல்யாண மண்டபம், சமுதாயக் கூடம், தங்கும் விடுதிகள் இல்லம் ஆகிய இடங்களில் வெளியாட்கள் யாரேனும் தங்கியுள்ளனரா என்பதும் கண்டறியப்படும்.
வாக்குப் பதிவு நாளில் ஒவ்வொரு வேட்பாளரின் சொந்த பயன்பாட்டுக்கு ஒரு வாகனம், தேர்தல் முகவரின் பயன்பாட்டுக்கு ஒரு வாகனம் மற்றும் தேர்தல் பணியாளர்கள் பயன்பாட்டுக்கு ஒரு வாகனம் என்றபடி அனுமதி வழங்கப்படும்.
வாக்காளர்களை வாக்குச் சாவடிக்கு அழைத்து வருவதற்கும், அங்கிருந்து அழைத்துச் செல்வதற்கும் வேட்பாளர் அல்லது அவரது முகவர் வாகனத்தை வாடகைக்கு எடுக்கவோ, வாங்கவோ அனுமதி கிடையாது. தேர்தல் அலுவலகம் வாக்குச் சாவடியில் இருந்து 100 மீட்டர் தொலைவுக்கு வெளியே அமைக்கப்படலாம். தேவையில்லாத கூட்டத்தை அவர்கள் அனுமதிக்கக் கூடாது. இவ்வாறு அதில் கூறப்பட்டுள்ளது. இந்நிலையில், வாக்காளர்களுக்கு அரசியல் கட்சியினர் பணம் தருவதை தடுக்க தேர் தல் அதிகாரிகள் தீவிர கண்காணிப்பில் ஈடுபட்டுள்ளனர்.